សិក្ខាសាលាស្តីពីកិច្ចគាំពារបរិស្ថាន

នៅព្រឹកថ្ងៃទី១៩ ខែតុលា ឆ្នាំ២០២២ អគ្គនាយកដ្ឋានគាំពារបរិស្ថាន ក្រសួងបរិស្ថាន បានរៀបចំសិក្ខាសាលាស្តីពីកិច្ចគាំពារបរិស្ថាន ក្រោមអធិបតីភាព និងដឹកនាំដោយ ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងមានការអញ្ចើញចូលរួមពីថ្នាក់ដឹកនាំ តំណាងអគ្គនាយកដ្ឋាន អគ្គាធិការដ្ឋាន នាយកដ្ឋាន ជាអង្គភាពចំណុះក្រសួង តំណាងក្រសួង ស្ថាប័ន មន្ទីរបរិស្ថានរាជធានី-ខេត្ត ដៃគូអភិវឌ្ឍន៍ វិស័យឯកជន និងថ្នាក់ដឹកនាំ មន្រ្តីរាជការអគ្គនាយកដ្ឋានគាំពារបរិស្ថាន សរុបមានចំនួន ១៩០ នាក់។សិក្ខាសាលានេះមានគោលបំណងសំខាន់គឺ ៖

១.ផ្សព្វផ្សាយលទ្ធផលការងារកិច្ចគាំពារបរិស្ថានឆ្នាំ២០២២

២.ពិនិត្យពិភាក្សា និងកំណត់វិធានការលើបញ្ហាប្រឈមពាក់ព័ន្ធការងារកិច្ចគាំពារបរិស្ថាន និងទិសដៅការងារឆ្នាំ២០២៣។

ឯកឧត្តម ប៉ាក សុខារ៉ាវុត អគ្គនាយកនៃអគ្គនាយកដ្ឋានបានមានមតិស្វាគមន៍ និងបានធ្វើរបាយការណ៍សង្ខេបស្តីពីលទ្ធផលការងារអគ្គនាយកដ្ឋានគាំពារបរិស្ថានឆ្នាំ២០២២ និងបញ្ហាប្រឈមមួយចំនួន ដែលនឹងដាក់ជូនអង្គសិក្ខាសាលាដើម្បីពិភាក្សា រកដំណោះ ស្រាយរួមគ្នា ក៏ដូចជាសំណូមពរពីគ្រប់ភាគីពាក់ព័ន្ធ សំដៅកំណត់ វិធានការ និងលើកទិសដៅការងារបន្តឆ្នាំ២០២៣ ដែលមានវាគ្មិនធ្វើបទបង្ហាញជូនអង្គសិក្ខាសាលាលើប្រធានបទចំនួន ៦រួមមាន ៖ ១.វិធានការគ្រប់គ្រងគុណភាពខ្យល់ ២.វិធានការគ្រប់គ្រងគុណភាពទឹក ៣.វិធានការគ្រប់គ្រងសំរាម សំណល់ទីប្រជុំជន ៤.វិធានការ គ្រប់គ្រងសារធាតុគ្រោះថ្នាក់ ៥.វិធានការគ្រប់គ្រងប្រភពបំពុល និងទី៦.ការវាយតម្លៃហេតុប៉ះពាល់បរិស្ថាន។

ក្នុងពិធីបើកអង្គសិក្ខាសាលាឯកឧត្តម សៅ សុភាព រដ្ឋលេខាធិការ បានមានមតិសម្តែងនូវការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងយកអស់កម្លាំងកាយ ចិត្ត បញ្ញា និងស្មារតីក្នុងការបំពេញតួនាទី ភារកិច្ច និងបេសកកម្មរបស់ខ្លួនពីសំណាក់ឯកឧត្តម អស់លោក លោកស្រី និងនាងកញ្ញាជាថ្នាក់ដឹកនាំ និងមន្រ្តីរាជការនៃអគ្គនាយកដ្ឋានគាំពារបរិស្ថាន ដើម្បីបុព្វហេតុការពារ បរិស្ថាន អភិរក្សជីវៈចម្រុះ គ្រប់គ្រងធនធានធម្មជាតិ អភិវឌ្ឍន៍ប្រកបដោយចីរភាព ក៏ដូចជាចូលរួមលើកកម្ពស់ សុខភាពសាធារណៈ និងសុខុមាលភាពសង្គមនៅក្នុងព្រះរាជាណាចក្រកម្ពុជា ហើយជាពិសេសដែលបាន រៀបចំឱ្យមានសិក្ខាសាលាដ៏មានសារៈសំខាន់នេះឡើង ដើម្បីប្រមូលធាតុចូលទាក់ទងនឹងកិច្ចគាំពារបរិស្ថាន ទៅក្នុងសន្និបាតបូកសរុបលទ្ធផលការងារបរិស្ថានឆ្នាំ២០២២ និងទិសដៅការងារឆ្នាំ២០២៣ របស់ក្រសួង បរិស្ថាន ដែលនឹងប្រព្រឹត្តទៅនៅថ្ងៃទី៣១ ខែតុលា និងថ្ងៃទី១ ខែវិច្ឆិកា ឆ្នាំ២០២២ ខាងមុខនេះ។

ឯកឧត្តមបានស្នើឱ្យអង្គសិក្ខាសាលា យកចិត្តទុកដាក់ ស្តាប់នូវបទបង្ហាញជាប្រធានបទដែលត្រូវជជែកពិភាក្សារកដំណោះស្រាយ ក៏ដូចជាសំណូមពរនានាពាក់ព័ន្ធ នឹងកិច្ចគាំពារបរិស្ថាន និងសុំឱ្យមានការចូលរួមផ្តល់មតិយោបល់ពីសំណាក់តំណាងក្រសួង ស្ថាប័ន រដ្ឋបាល ថ្នាក់ក្រោមជាតិ ដៃគូអភិវឌ្ឍន៍ និងវិស័យឯកជនពាក់ព័ន្ធ ដែលជាធាតុចូលដ៏សំខាន់សម្រាប់រួមគ្នាស្វែងរកវិធានការសមស្រប និងកំណត់ទិសដៅការងារ ក្នុងការឆ្លើយតបទៅនឹងចក្ខុវិស័យរបស់រាជរដ្ឋាភិបាល ក្នុងការ ពង្រឹងប្រសិទ្ធភាពការងារគ្រប់គ្រងបរិស្ថាន និងធនធានធម្មជាតិប្រកបដោយចីរភាព។