សិក្ខា​សាលា​ពិគ្រោះ​យោបល់​ថ្នាក់​ជាតិ​លើក​ទី៣ ស្តីពី «​​សេចក្តី​ព្រាង​ក្រម​បរិស្ថាន និង​ធន​ធាន​ធម្មជាតិ នៃប្រទេស​កម្ពុជា»

ទីស្តីការក្រសួងបរិស្ថាន នៅព្រឹកថ្ងៃទី២៤ ខែវិច្ឆិការ ឆ្នាំ២០១៦ ឯកឧត្តម សាយ សំអាល់រដ្ឋមន្រ្តីក្រសួងបរិស្ថាន បានអញ្ចើញ បានអញ្ជើញជាអធិបតីបើកសិក្ខាសាលាពិគ្រោះយោបល់ថ្នាក់ជាតិលើកទី៣ ស្តីពី «សេចក្តីព្រាងក្រមបរិស្ថាន និងធនធានធម្មជាតិ នៃប្រទេសកម្ពុជា» ដែលរៀបចំដោយក្រសួងបរិស្ថាន សហការជាមួយក្រុមធាវីវីស្ណុ និងមានការចូលរួមពីគ្រប់ស្ថាប័នពាក់ព័ន្ធ ទាំងថ្នាក់ខេត្ត មន្ទីរបរិស្ថានខេត្ត អង្គការមិនមែនរដ្ឋាភិបាល អង្គការដៃគូជាតិ និងអន្តរជាតិ សហគមន៍ ប្រមាណជាង២០០នាក់ ដើម្បីពង្រីកការផ្សព្វផ្សាយគោលនយោបាយ ពង្រឹងប្រសិទ្ធិភាពនៃកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍន៍ដោយចីរភាព ទៅដល់ថ្នាក់ជាតិ ថ្នាក់ក្រោមជាតិ និងអ្នកពាក់ព័ន្ធ។

នាឱកាសនោះ ឯកឧត្តមរដ្ឋមន្រ្តី បានវាយតម្លៃខ្ពស់ចំពោះការខិតខំប្រឹងប្រែងរបស់អង្គការដៃគូ និងស្ថាប័នពាក់ព័ន្ធទាំងអស់ ក្នុងការគ្រប់គ្រង និងការអភិរក្សជីវចម្រុះ ដែលស្ថិតនៅក្រោមសមត្ថកិច្ចរបស់ក្រសួងបរិស្ថានស្របទៅនឹងបទបញ្ញាតិនៃក្រមនេះ ទាំងការគ្រប់គ្រងច្រករបៀងអភិរក្សជីវចម្រុះ និងតំបន់ការពារដទៃទៀត និងតំបន់ការពារថ្នាក់ខេត្ត ថ្នាក់ក្រុង ថ្នាក់មូលដ្ឋានត្រូវធានាបាននូវសិទ្ធិរបស់សហគមន៍មូលដ្ឋាន និងការចុះបញ្ជីដីធ្លីរបស់សហគមន៍ជនជាតិដើមភាគតិច និងសាធារណជន៕