កិច្ចប្រជុំអន្តរក្រសួង ស្តីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) សម្រាប់គម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ សម្រាប់អនុគម្រោងការគ្រប់គ្រងទឹកកខ្វក់ក្រុងបាត់ដំបង របស់ក្រសួងសាធារណការ និងដឹកជញ្ជូន
ថ្ងៃ ចន្ទ, 24 កុម្ភៈ, 2020ទីស្តីការក្រសួងបរិស្ថាន នៅរសៀលថ្ងៃចន្ទ ២កើត ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៤ ខែកុម្ភៈ ឆ្នាំ២០២០ ឯកឧត្តម នេត្រ ភក្រ្តា រដ្ឋលេខាធិការនៃក្រសួងបរិស្ថាន បានដឹកនាំកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) សម្រាប់គម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ សម្រាប់អនុគម្រោង ការគ្រប់គ្រងទឹកកខ្វក់ក្រុងបាត់ដំបង ដែលមានទីតាំងស្ថិតនៅសង្កាត់រតនៈ សង្កាត់ព្រែកព្រះស្តេច ក្រុងបាត់ដំបង និងភូមិបាឡាត់ ឃុំនរា ស្រុកសង្កែ ខេត្តបាត់ដំបង របស់ក្រសួងសាធារណការ និងដឹកជញ្ជូន(ម្ចាស់គម្រោង) ព្រមទាំងសិក្សា និងរៀបចំរបាយការណ៍ដោយក្រុមហ៊ុនទីប្រឹក្សា SBK Research and Development Co., Ltd.។
កិច្ចប្រជុំនេះ មានសមាសភាពចូលរួមពីតំណាងអគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍ដោយចីរភាព អគ្គនាយកដ្ឋានពាក់ព័ន្ធនៃក្រសួងបរិស្ថាន តំណាងអន្តរក្រសួងពាក់ព័ន្ធ ក្រុមប្រឹក្សាអភិវឌ្ឍន៍កម្ពុជា រដ្ឋបាលខេត្តបាត់ដំបង មន្ទីរបរិស្ថានខេត្តបាត់ដំបង នាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថាន និងក្រុមហ៊ុនទីប្រឹក្សា ចំនួន ៣២នាក់។
ជារួម កិច្ចប្រជុំនេះ បានទទួលលទ្ធផលដូចខាងក្រោម៖
១- អង្គប្រជុំ សូមគាំទ្រគម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ សម្រាប់អនុគម្រោង ការគ្រប់គ្រងទឹកកខ្វក់ក្រុងបាត់ដំបង
២- ម្ចាស់គម្រោង ត្រូវសិក្សាបន្ថែមស្របទៅតាមការផ្តល់យោបល់របស់អង្គប្រជុំ និងនាយកដ្ឋានវាយតម្លៃហេតុប៉ះពាល់បរិស្ថាន ទៅក្នុងរបាយការណ៍ (IESIA) សម្រាប់គម្រោងនេះ
៣- ម្ចាស់គម្រោង ត្រូវគ្រប់គ្រងសំរាម អាចម៍ដី និងសំណល់ភក់ ព្រមទាំងធ្វើការត្រួតពិនិត្យលើសំណល់ភក់ឱ្យបានត្រឹមត្រូវ ក្នុងករណីបើពិនិត្យឃើញថា គ្មានសារធាតុគីមី នោះយើងអាចប្រើជាជីសម្រាប់ដាំដំណាំកសិកម្ម ឬដំណាំស្រូវ ចៀសវាងដាក់បន្ទុកបន្ថែមទៅលើទីលានចាក់សំរាម
៤- ម្ចាស់គម្រោង ត្រូវសិក្សាប្រវត្តិទឹកជំនន់នៅត្រង់ស្ថានីយប្រព្រឹត្តកម្មទឹកកខ្វក់ ព្រមទាំងរចនាអាងប្រព្រឹត្តកម្មទឹកកខ្វក់ ចៀសវាងមានការជន់លិចនៅរដូវវស្សា
៥- ម្ចាស់គម្រោង ត្រូវត្រួតពិនិត្យបញ្ហាក្លិនដែលភាយចេញពីអាងប្រព្រឹត្តកម្មទឹកកខ្វក់ និងរៀបចំវិធានការកាត់បន្ថយក្លិនឱ្យបានត្រឹមត្រូវ ចៀសវាងបង្កឱ្យមានការប៉ះពាល់ដល់ការរស់នៅរបស់ប្រជាពលរដ្ឋនៅក្បែរទីតាំងគម្រោង ព្រមទាំងដាំឈើព័ទ្ធជុំវិញទីតាំងគម្រោង ដើម្បីជួយកាត់បន្ថយបញ្ហាក្លិន
៦- ម្ចាស់គម្រោង ត្រូវធ្វើការត្រួតពិនិត្យគុណភាពទឹកកខ្វក់ជាប្រចាំឱ្យមានសុវត្ថិភាព មុននឹងបង្ហូរចេញពីអាងប្រព្រឹត្តកម្មរួមទៅកាន់ប្រឡាយ និងប្រភពទឹកសាធារណៈ ចៀសវាងបង្កឱ្យមានការប៉ះពាល់ដល់ជីវៈចម្រុះក្នុងទឹក គុណភាពទឹកអូរ និងស្ទឹងសង្កែ
៧- ម្ចាស់គម្រោង ត្រូវសហការជាមួយអាជ្ញាធរមូលដ្ឋាន ដើម្បីបញ្ចៀសពីផលប៉ះពាល់ ឬដោះស្រាយជាមួយប្រជាពលរដ្ឋពីសកម្មភាពគម្រោង
៨- ម្ចាស់គម្រោង ត្រូវស្រោចទឹកជាប្រចាំ និងគោរពទៅតាមបទដ្ឋានរបស់ក្រសួងបរិស្ថាន ដែលពាក់ព័ន្ធនឹងការហុយធូលី និងសំឡេង
៩- ម្ចាស់គម្រោង ត្រូវសិក្សាពីការប៉ះពាល់ទៅលើប្រព័ន្ធទឹកស្អាត ខ្សែបញ្ជូនអគ្គិសនី និងប៉ះពាល់ទៅលើមុខរបររកស៊ីរបស់ប្រជាពលរដ្ឋ ព្រមទាំងធ្វើការដោះស្រាយឱ្យបានត្រឹមត្រូវ ដោយសហការជាមួយស្ថាប័នពាក់ព័ន្ធ និងអាជ្ញាធរមូលដ្ឋាន
១០- ម្ចាស់គម្រោង ត្រូវអប់រំដល់កម្មករឱ្យមានសីលធម៌ល្អ
១១- ម្ចាស់គម្រោង ត្រូវគិតគូរអំពីសុខភាព និងសុវត្ថិភាពដល់បុគ្គលិក-កម្មករ៕
ព័ត៌មានបន្ថែម
