កិច្ចប្រជុំអន្តរក្រសួងស្តីពីការពិនិត្យ និងផ្តល់ យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) សម្រាប់គម្រោងបង្កើតអគារពាណិជ្ជកម្ម និងពហុមុខងាររបស់ក្រុមហ៊ុន SUN WAH PROPERTIES (CAMBODIA) CO., LTD.
ថ្ងៃ អង្គារ, 25 កុម្ភៈ, 2020ទីស្តីការក្រសួងបរិស្ថាន នៅរសៀលថ្ងៃអង្គារ ៣កើត ខែផល្គុន ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៥ ខែកុម្ភៈ ឆ្នាំ២០២០ លោកជំទាវ ព្រំ សុភី អនុរដ្ឋលេខាធិការនៃក្រសួងបរិស្ថាន បានដឹកនាំ កិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ សម្រាប់គម្រោងបង្កើតអគារពាណិជ្ជកម្ម និងពហុមុខងារ របស់ក្រុមហ៊ុន SUN WAH PROPERTIES (CAMBODIA) CO., LTD. (ម្ចាស់គម្រោង) ព្រមទាំងសិក្សា និង រៀបចំរបាយការណ៍ដោយក្រុមហ៊ុន ទីប្រឹក្សា RTM GREEN CONSULTANCY CO., LTD.។
កិច្ចប្រជុំនេះ មានសមាសភាពចូលរួមពីតំណាងអគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍ដោយចីរភាព តំណាងអគ្គនាយកដ្ឋានពាក់ព័ន្ធនៃក្រសួងបរិស្ថាន តំណាងអន្តរក្រសួងពាក់ព័ន្ធ ក្រុមប្រឹក្ស អភិវឌ្ឍន៍កម្ពុជា រដ្ឋបាលរាជធានីភ្នំពេញ មន្ទីរបរិស្ថាន រាជធានីភ្នំពេញ នាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថាន និងក្រុមហ៊ុនទីប្រឹក្សា សរុបចំនួន ៣៨នាក់។
ជារួម កិច្ចប្រជុំនេះ បានទទួលលទ្ធផល ដូចខាងក្រោម៖
១- អង្គប្រជុំ គាំទ្រគម្រោងអភិវឌ្ឍន៍នេះ
២- ក្រុមហ៊ុន ត្រូវបញ្ចូលសេចក្តីណែនាំលេខ ០០២ដនស/សណន ចុះថ្ងៃទី១០ ខែមករា ឆ្នាំ២០២០ ស្តីពីការពង្រឹងគុណភាព និងសុវត្ថិភាពសំណង់ និងលិខិតបទដ្ឋានគតិយុត្តមួយចំនួនទៀត ដែលពាក់ព័ន្ធ នឹងការងារសំណង់ ទៅក្នុងរបាយការណ៍ ESIA
៣- ក្រុមហ៊ុន ត្រូវធ្វើការគ្រប់គ្រងសម្ភារសំណង់ និងរៀបចំទីតាំងដងសន្ទួចឱ្យបានត្រឹមត្រូវ ចៀសវាងបង្កឱ្យមានគ្រោះថ្នាក់ដោយយថាហេតុណាមួយដល់សាធារណជន ឬកម្មករ
៤- ក្រុមហ៊ុន ត្រូវរៀបចំកន្លែងស្នាក់នៅឱ្យ បុគ្គលិក-កម្មករឱ្យបានសមរម្យ ដោយមិនត្រូវអនុញ្ញាតឱ្យពួកគាត់ស្នាក់នៅក្នុងការដ្ឋានសាងសង់នោះទេ
៥- ក្រុមហ៊ុន ត្រូវរៀបចំប្រព័ន្ធដោះទឹកភ្លៀង និងប្រព័ន្ធលូទឹកកខ្វក់ដាច់ដោយឡែកពីគ្នាឱ្យបានត្រឹមត្រូវ ហើយទឹកកខ្វក់ដែលបាន សម្អាតរួច ត្រូវអនុលោមតាមស្តង់ដារនៃ អនុក្រឹត្យលេខ ២៣៥អនក្រ.បក ស្តីពីការគ្រប់គ្រងប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់
៦- ក្រុមហ៊ុន ត្រូវសហការជាមួយក្រុមហ៊ុនដែលមានអាជ្ញាបណ្ណក្នុងការប្រមូលសំរាម ដើម្បីប្រមូលសំរាមពីទីតាំងគម្រោងឱ្យបានត្រឹមត្រូវ ដោយអនុលោមតាមអនុក្រឹត្យលេខ ១១៣អនក្រ.បក ស្តីពីការគ្រប់គ្រងសំរាម សំណល់រឹងទីប្រជុំជន
៧- ក្រុមហ៊ុន ត្រូវធ្វើការសាងសង់ឱ្យបានត្រឹមត្រូវទៅតាមលិខិតអនុញ្ញាតការសាងសង់របស់ក្រសួងរៀបចំដែនដី នគរូបនីយកម្ម និងសំណង់ ព្រមទាំងកាត់ បន្ថយសំឡេងនិងរំញ័រ និងការកកស្ទះចរាចរណ៍នៅក្នុងតំបន់គម្រោង
៨- ក្រុមហ៊ុន ត្រូវធ្វើការរចនាចំណតរថយន្តឱ្យបានគ្រប់គ្រាន់ ដើម្បីឱ្យស្របទៅតាមសមាមាត្រនៃអ្នកប្រើប្រាស់អគាររបស់ក្រុមហ៊ុន ចៀសវាងការចតលើផ្លូវសាធារណៈ ដែលបង្កឱ្យមានការប៉ះពាល់ដល់ការធ្វើចរាចរណ៍របស់ប្រជាជន
១០- ម្ចាស់គម្រោង ត្រូវសហការជាមួយក្រុមហ៊ុនទីប្រឹក្សា ដើម្បីកែសម្រួលរបាយការណ៍ ESIA ឱ្យបានត្រឹមត្រូវ ស្របតាមស្មារតីអង្គប្រជុំ៕
ព័ត៌មានបន្ថែម
