កិច្ចប្រជុំលើកទី៩ នៃវេទិកាវិទ្យាសាស្រ្ត-នយោបាយអន្តររដ្ឋាភិបាលស្តីពីជីវៈចម្រុះ និងសេវាកម្មប្រព័ន្ធអេកូឡូស៊ី (IPBES-9) នៅទីក្រុងបោន ប្រទេសអាល្លឺម៉ង់
ថ្ងៃ អង្គារ, 5 កក្កដា, 2022លោកជំទាវ ចាន់ សុម៉ាលី អនុរដ្ឋលេខាធិការក្រសួងបរិស្ថាន និងជាជនបង្គោល IPBES បានដឹកនាំប្រតិភូក្រសួងបរិស្ថាន និងសាកលវិទ្យាល័យភូមិន្ទភ្នំពេញ ចូលរួមកិច្ចប្រជុំលើកទី៩ នៃវេទិកាវិទ្យាសាស្រ្ត-នយោបាយអន្តររដ្ឋាភិបាលស្តីពីជីវៈចម្រុះ និងសេវាកម្មប្រព័ន្ធអេកូឡូស៊ី (IPBES-9) នៅទីក្រុងបោន ប្រទេសអាល្លឺម៉ង់។ កិច្ចប្រជុំនេះរៀបចំឡើងដោយលេខាធិការដ្ឋាន IPBES ដែលមានការចូលរួមពីប្រទេសជារដ្ឋភាគី ទីភ្នាក់ងារអង្គការសហប្រជាជាតិ អង្គការសង្គមស៊ីវិល និងអ្នកពាក់ព័ន្ធ សរុបប្រមាណជាង១០០០នាក់ ពីថ្ងៃទី៣ ដល់ថ្ងៃទី៩ ខែកក្កដា ឆ្នាំ២០២២។
គោលបំណងនៃកិច្ចប្រជុំនេះ គឺដើម្បីបន្តពិនិត្យ ពិភាក្សា និងសម្រេចលើសេចក្តីព្រាងរបាយការណ៍វិទ្យាសាស្ត្រសំខាន់ៗចំនួន៣ គឺ៖ ១)ការសិក្សាវាយតម្លៃលើការប្រើប្រាស់ប្រភេទសត្វ និងរុក្ខជាតិព្រៃប្រកបដោយចីរភាព ២)វិធីសាស្រ្តវាយតម្លៃលើគុណតម្លៃនៃជីវៈចម្រុះ និងសេវាកម្មប្រព័ន្ធអេកូឡូស៊ី និង ៣) ការកំណត់វិធីសាស្ត្រសម្រាប់វាយតម្លៃអំពីផលប៉ះពាល់នៃការធ្វើអាជីវកម្មលើធនធានជីវៈចម្រុះ និងការរួមចំណែករបស់ធនធានជីវៈចម្រុះសម្រាប់ផលប្រយោជន៍របស់មនុស្សជាតិ។ របាយការណ៍ទាំងនេះនឹងត្រូវដាក់ជូនទៅលេខាធិការដ្ឋានអនុសញ្ញាសហប្រជាជាតិស្តីពីជីវៈចម្រុះ (UNCBD) ដើម្បីពិចារណារក្នុងការប្រើប្រាស់ជាមូលដ្ឋាន និងជាធាតុចូលសម្រាប់ការរៀបចំក្របខណ្ឌការងារជីវៈចម្រុះសកលក្រោយឆ្នាំ២០២០ (Post-2020 GBF) ដែលគ្រោងនឹងដាក់ជូនសន្និសីទកំពូលលើកទី១៥ (UNCBD COP-15) ពិនិត្យ និងអនុម័តនាខែធ្នូ ឆ្នាំ២០២២ នៅទីក្រុងម៉ុងរ៉េអាល់ ប្រទេសកាណាដា។
ក្រៅពីនេះ កិច្ចប្រជុំក៏នឹងពិនិត្យលេីផែនការនៃការកៀរគរថវិកា និងការកសាងសមត្ថភាពផ្នែកវិទ្យាសាស្ត្រសម្រាប់គាំទ្រដល់ដល់ការធ្វើសេចក្តីសម្រេចថ្នាក់នយោបាយផងដែរ៕
ព័ត៌មានបន្ថែម
