«កម្មវិធីលើកទឹកចិត្តមេត្រីភាពបរិស្ថាន» និងពិធីប្រគល់ជ័យលាភីប្រឡងប្រណាំង «ភូមិ-ឃុំ-សង្កាត់មានសុវត្ថិភាព»

ថ្លែងទៅកាន់អង្គពិធី ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន បានមានប្រសាសន៍ថា «កម្មវិធីលើកទឹកចិត្តមេត្រីភាពបរិស្ថាន» និងពិធីប្រគល់ជ័យលាភីប្រឡងប្រណាំង «ភូមិ-ឃុំ-សង្កាត់មានសុវត្ថិភាព» ដែលបានរៀបចំឡើងនាពេលនេះ គឺជាភារកិច្ចស្នូលមួយរបស់អគ្គនាយកដ្ឋានចំណេះដឹងនិងព័ត៌មានបរិស្ថាន ក្រសួងបរិស្ថាន ក្នុងការផ្លាស់ប្ដូរផ្នត់គំនិត បញ្ជ្រៀបការយល់ដល់ប្រជាពលរដ្ឋអំពីបរិស្ថាន និងចូលរួមប្រតិបត្តិមេត្រីភាពបរិស្ថាន ស្របតាមចក្ខុវិស័យដែលរាជរដ្ឋាភិបាលបានកំណត់ គឺប្រែក្លាយកម្ពុជា ជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០ ដែលនៅពេលនោះគុណភាពបរិស្ថាន និងនិរន្តរភាពបរិស្ថានត្រូវបានធានា។ ដើម្បីសម្រេចការងារនេះ ក្រសួងបរិស្ថានបានសហការយ៉ាងជិតស្និទ្ធជាមួយអង្គភាពចំណុះក្រសួងបរិស្ថាន ក្រសួងស្ថាប័នពាក់ព័ន្ធ អាជ្ញាធរដែនដីថ្នាក់ក្រោមជាតិ ដៃគូរអភិវឌ្ឍន៍ អង្គការសង្គមស៊ីវិល និងវិស័យឯកជន។

ក្ឯកឧត្តម នេត្រ ភក្ត្រា បានថ្លែងថា ក្រោមដំបូលនៃសុខសន្តិភាពពេញលេញ និងស្ថេរភាពនយោបាយដ៏រឹងមាំ ដែលជាសមិទ្ធិផលនៃមាគ៌ាដឹកនាំយុទ្ធសាស្រ្ត និងគោលនយោបាយដ៏ត្រឹមត្រូវនានាជាបន្តបន្ទាប់ ស្របតាមដំណាក់កាលផ្សេងៗនៃការវិវត្តរបស់សង្គមជាតិ រាជរដ្ឋាភិបាលបានធ្វើការកែលម្អផែនការណែនាំ ស្តីពីការចាត់តាំងអនុវត្ត គោលនយោបាយ «ភូមិ ឃុំ-សង្កាត់មានសុវត្ថិភាព» ជាបន្តបន្ទាប់ ឱ្យស្របតាមបរិបទនៃការវិវត្ត និងអភិវឌ្ឍរបស់សង្គមជាតិ ដែលជាការបុកគ្រឹះសម្រាប់ទ្រទ្រង់កំណើនសេដ្ឋកិច្ចដ៏រឹងមាំ និងការអភិវឌ្ឍលើគ្រប់វិស័យដូចសព្វថ្ងៃនេះ បានស្តែងចេញនូវការលើកកម្ពស់សោភ័ណភាពទីក្រុង ទីប្រជុំជនជនបទ ការរៀបចំ រចនាសម្ព័ន្ធ និង ប្រព័ន្ធគ្រប់គ្រង រដ្ឋបាល ទំនើបដែលមានភាពជាម្ចាស់ និងមានសមត្ថភាពក្នុងការ អនុវត្តតួនាទីប្រកបដោយ ប្រសិទ្ធភាពលើការ ងារ គ្រប់គ្រង សំរាម សំណល់ រឹង នៅតាមទីក្រុង និងទីប្រជុំជន ក្រុង ស្រុក ការផ្តល់មធ្យោបាយ សម្ភារៈគាំទ្រការងារគ្រប់គ្រង និងផ្តល់សេវាប្រមូលសំរាម មានជាអាទិ៍៖ ឡដុតសំរាម ឡានដឹកសំរាម ម៉ូតូកង់បី និង បានបំពាក់ម៉ាស៊ីនចម្រោះ ទឹកក្តៅទឹកត្រជាក់នៅតាមគ្រឹះស្ថានសិក្សារដ្ឋនិងឯកជន និងទីអារាម។ ការរៀបចំសណ្តាប់ធ្នាប់សាធារណៈ បញ្ហាសុខុមាលភាពរបស់ប្រជាពលរដ្ឋ ការផ្តល់សេវាចាំបាច់នានា និងការអប់រំប្រជាពលរដ្ឋទាំងអស់ឱ្យយកចិត្តទុកដាក់ចំពោះបរិស្ថាន ដើម្បីធានាឱ្យជនគ្រប់រូប សង្គមកម្ពុជាទាំងមូល មានភាពស្អាត និងផាសុខភាពក្នុងការរស់នៅឱ្យស្របតាមបរិបទនៃការរីកចម្រើនរបស់សង្គមជាតិ។

ឯកឧត្តមរដ្ឋលេខាធិការបានថ្លែងថា ចលនាប្រឡងប្រណាំង «ភូមិ ឃុំ-សង្កាត់មានសុវត្ថិភាព» ក្នុងក្របខណ្ឌលក្ខណសម្បត្តិទី៦ ជាផ្នែកមួយនៃការអភិវឌ្ឍខ្សែក្រវ៉ាត់បៃតង (Green Belt) នៅកម្ពុជា ធ្វើឱ្យទីក្រុង ទីប្រជុំជនប្រទេសយើងកាន់តែស្រស់ស្អាត ប្រកបដោយភាពទាក់ទាញ មានបរិស្ថានល្អដែលឆ្ពោះទៅរកគោលដៅ «កម្ពុជាស្អាត អនាគតដែលយើងចង់បាន» ដែលពាក់ព័ន្ធនឹងទេសចរណ៍ធម្មជាតិ កសិ-ទេសចរណ៍ ក៏ដូចជាទេសចរណ៍ជនបទ និងប្រែក្លាយផលិតផលកសិកម្មរបស់កម្ពុជាទៅជាកសិ-ទេសចរណ៍ ទេសចរណ៍ធម្មជាតិ ឬទេសចរណ៍ជនបទ ដើម្បីឱ្យភ្ញៀវទេសចរណ៍ជាតិ និងអន្តរជាតិអាចបរិភោគអាហារក្នុងស្រុកនៅតាមតំបន់ទេសចរណ៍ផ្សេងៗដោយសុវត្ថិភាព។ ក្នុងបរិបទកូវីដ-១៩ ទេសចរណ៍ធម្មជាតិ កសិ-ទេសចរណ៍ និងទេសចរណ៍ជនបទ ត្រូវបានអ្នកទេសចរណ៍ជាតិ អន្តរជាតិទទួលស្គាល់ថា ជាកន្លែងដែលល្អបំផុតសម្រាប់ដំណើរកំសាន្តរបស់ប្រជាពលរដ្ឋ និងភ្ញៀវទេសចរ។ ទាំងអស់នេះក៏បានរួមចំណែកប្រែក្លាយទីក្រុង គ្រប់ទីប្រជុំជន ភូមិ ឃុំ-សង្កាត់ទាំងអស់មានអនាម័យល្អ ភាពស្អាតនិងបៃតង និងរួមចំណែកដល់ការជំរុញកំណើនសេដ្ឋកិច្ចមូលដ្ឋាន ព្រមទាំងការលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋនៅជនបទ។

ជាមួយគ្នានេះផងដែរ ឯកឧត្តមរដ្ឋលេខាធិការក៏បានគូសបញ្ជាកថា នៅឆ្នាំ២០២២នេះ ក្រសួងបរិស្ថានបានរៀបចំ ចលនាប្រឡងប្រណាំង «ភូមិ-ឃុំ-សង្កាត់មានសុវត្ថិភាព» ក្នុងក្របខណ្ឌលក្ខណៈសម្បត្តិទី៦គឺមានអនាម័យ មានសោភ័ណភាពល្អនិងបរិស្ថានល្អ ក្នុងគោលបំណងជំរុញឲ្យអាជ្ញាធរភូមិ ឃុំ សង្កាត់ យកចិត្តទុកបន្ថែមក្នុងការរៀបចំមូលដ្ឋានរបស់ខ្លួនឲ្យមានអនាម័យ សោភ័ណភាព និងបរិស្ថានល្អ ដើម្បីភាពសុដុមរម្យណីកម្ម ការទាក់ទាញភ្ញៀវទេសចរណ៍ និងការលើកកម្ពស់សុខុមាលភាពប្រជាពលរដ្ឋ។ ដើម្បីគាំទ្រដល់អាជ្ញាធរមូលដ្ឋាន ក្រសួងបរិស្ថានបានគាំទ្រយ៉ាងពេញទំហឹងលើផ្នែកបច្ចេកទេស ធនធានសម្ភារៈ និងថវិកា ដើម្បីសម្រេចឲ្យបាននូវគោលដៅខាងលើគឺអនាម័យ សោភ័ណភាព និងបរិស្ថានល្អនៅមូលដ្ឋាន។

ក្នុងនាមក្រសួងបរិស្ថាន ឯកឧត្តមរដ្ឋលេខាធិការ បានសម្ដែងនូវការកោតសរសើរ និងវាយតម្លៃខ្ពស់ចំពោះការចូលរួមពីសំណាក់អ្នកពាក់ព័ន្ធទាំងអស់ ដែលបានចូលរួមប្រតិបត្តិមេត្រីបរិស្ថានបានល្អក្នុងការផលិត ការផ្តល់សេវាកម្ម ការធ្វើអាជីវកម្មប្រកបដោយការទួលខុសត្រូវខ្ពស់ចំពោះបរិស្ថាន និងសង្គម។ ឯកឧត្តមក៏បានកោតសរសើរចំពោះក្រសួង ស្ថាប័ន អង្គការសង្គមស៊ីវិល និងអង្គភាពថ្នាក់ក្រោមជាតិ ដែលបានដឹកនាំសកម្មភាព សំដៅចូលរួមកិច្ចគាំពារបរិស្ថាន ការអភិរក្សជីវៈចម្រុះ ការប្រើប្រាស់ធនធានធម្មជាតិឲ្យមាននិរន្តរភាព និងការរស់នៅដោយចីរភាព។