កិច្ចប្រជុំបណ្តាញសហគមន៍អភិរក្សធនធានធម្មជាតិថ្នាក់តំបន់ខាងកើតទន្លេមេគង្គ លើប្រធានបទ «តួនាទីបណ្តាញក្នុងការចូលរួមគ្រប់គ្រងធនធានធម្មជាតិ»
ថ្ងៃ ចន្ទ, 26 តុលា, 2020រតនគីរី ៖ នាយកដ្ឋានជីវភាពសហគមន៍ នៃអគ្គនាយកដ្ឋានសហគមន៍មូលដ្ឋាន បានរៀបចំកិច្ចប្រជុំបណ្តាញសហគមន៍អភិរក្សធនធានធម្មជាតិ ថ្នាក់តំបន់ខាងកើតទន្លេមេគង្គលើប្រធានបទ «តួនាទីបណ្តាញក្នុងការចូលរួមគ្រប់គ្រងធនធានធម្មជាតិ» នៅស្នាក់ការសហគមន៍តំបន់ការពារធម្មជាតិបឹងយក្សឡោម ភូមិឡាប៉ូ សង្កាត់យក្សឡោម ក្រុងបានឡុង ខេត្តរតនគីរី ក្រោមវត្តមាន លោក អ៊ុក ណាវ៉ាន់ អគ្គនាយករង នៃអគ្គនាយកដ្ឋានសហគមន៍មូលដ្ឋាន និងជាអនុប្រធានអចិន្ត្រៃយ៍សហគមន៍មូលដ្ឋាន លោក អ៊ូ សេរី អគ្គនាយករង នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ លោក ខ្វៃ អាទិត្យា អគ្គនាយករង នៃអគ្គនាយកដ្ឋានចំណេះដឹង និងព័ត៌មានបរិស្ថាន រួមជាមួយថ្នាក់ដឹកនាំនិងមន្ត្រីរាជការក្រសួងបរិស្ថាន ថ្នាក់ដឹកនាំ និងសមាជិកនៃគណៈកម្មការបណ្តាញសហគមន៍ថ្នាក់តំបន់ខាងកើតទន្លេមេគង្គ និងតំណាងដៃគូអភិវឌ្ឍន៍។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគីរី បានឱ្យដឹងថា កិច្ចប្រជុំនេះក្នុងគោលបំណងដើម្បីបង្ហាញពីវឌ្ឍនភាពការងារ ដែលបណ្តាញសហគមន៍អភិរក្សធនធានធម្មជាតិថ្នាក់តំបន់ខាងកើតទន្លេមេគង្គសម្រេចបាន រួមទាំងបញ្ហាប្រឈម និងដំណោះស្រាយក្នុងការគ្រប់គ្រងសហគមន៍តំបន់ការពារធម្មជាតិព្រមទាំងកំណត់ផែនការសកម្មភាពជាអាទិភាពសម្រាប់អនុវត្តបន្ត។
លោក អ៊ុក ណាវ៉ាន់ បានមានប្រសាសន៍ពីសាវតានៃការបង្កើតបណ្តាញ សហគមន៍តំបន់ការពារធម្មជាតិដែលបានបង្កើតទាំង១៧៤ រហូតមកដល់ឆ្នាំ២០២០នេះ និងបណ្តាញទាំង៣៥នៅខាងជើង និងខាងត្បូងបឹងទន្លេសាប និងខាងកើតទន្លេមេគង្គ ព្រមទាំងពង្រឹងកិច្ចសហការណ៍គ្នាដើម្បីលើកស្ទួយជីវភាពប្រជាសហគមន៍តាមរយៈការអភិរក្សធនធានធម្មជាតិ និងទេសចរណ៍ធម្មជាតិ ។
លោកអគ្គនាយករង បានជម្រុញឱ្យសហគមន៍ដាំដំណាំរួមផ្សំ និងការចិញ្ចឹមសត្វដើម្បីប្រើប្រាស់ក្នុងគ្រួសារ និងបង្កើនប្រាក់ចំណូលបន្ថែម ហើយនិងរួមចំណែកកាត់បន្ថយសម្ពាធការប្រើប្រាស់ធនធានធម្មជាតិ ។
ក្នុងឱកាសនោះក៏បានមានពន្យល់ណែនាំ ដល់គណៈកម្មការបណ្តាញសហគមន៍ថ្នាក់តំបន់ខាងកើតទន្លេមេគង្គ និងអ្នកចូលរួមទាំងអស់ពីការបង្ការការពារខ្លួនពីជម្ងឺគ្រុនចាញ់ និងជម្ងឺគ្រុនឈាម និងចែកមុងជ្រលក់ថ្នាំ ដល់គណៈកម្មការបណ្តាញសហគមន៍ចំនួន៤ខេត្ត គឺខេត្តរតនគីរី មណ្ឌលគីរី (ចែករួច) ក្រចេះ និងខេត្តស្ទឹងត្រែង ៕
ព័ត៌មានបន្ថែម
