ពិធីសំណេះសំណាល សាកសួរសុខទុក្ខ និងផ្សព្វផ្សាយស្តីពី«វិធីបង្ការ ការពារទប់ស្កាត់ជំងឺគ្រុនចាញ់ និងថែទាំសុខភាពអនាម័យ »

លោកជំទាវ ម៉ុម ថានី ប្រធានក្រុមការងារលុបបំបាត់ជំងឺគ្រុនចាញ់ និងជាប្រធានសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន បានមានប្រសាសន៍បញ្ជាក់ថា ក្រោមការដឹកនាំរបស់ឯកឧត្តមរដ្ឋមន្រ្តី បច្ចុប្បន្នកម្ពុជាមានតំបន់ការពារធម្មជាតិចំនួន ៧៣ និងរបៀងអភិរក្សជីវៈចម្រុៈចំនួន៣កន្លែង ក្នុងទំហំផ្ទៃដីប្រមាណ ៧,២លានហិកតា ប៉ុន្តែយើងមានមន្រ្តីឧទ្យានុរក្សតែ ១១១៥នាក់ ទាំងមន្រ្តីឧទ្យានុរក្ស និងគណៈកម្មការសហគមន៍តំបន់តារពារធម្មជាតិបានដើរតួនាទីស្នូលយ៉ាងសំខាន់ក្នុងសកម្មភាពចុះ ល្បាតទប់ស្កាត់បទល្មើសធនធានធម្មជាតិ ក្នុងតំបន់ការពារធម្មជាតិ ។កាតព្វកិច្ចដ៏ឧត្តុងឧត្តមនេះ ត្រូវផ្សាភ្ជាប់យ៉ាងសំខាន់នូវ កំលាំងចិត្ត ឆន្ទៈមុះមុត និងទាមទារនូវសុខភាពមាំមួនផងដែរ ដូចនេះដើម្បីរួមចំណែកគិតគូរបន្ថែមពីលើ គោលនយោបាយគាំពារមន្រ្តីរាជការរបស់ក្រសួងបរិស្ថាន ក្រុមការងារបានរៀបចំជាបន្តបន្ទាប់នូវវគ្គបណ្តុះបណ្តាល និងកម្មវិធីផ្សព្វផ្សាយ ស្តីពី «ការការពារ ការបង្ការទប់ ស្កាត់ជំងឺគ្រុនចាញ់ និងការថែទាំសុខភាព»ជូនដល់ប្រជាសហគមន៍ ឧទ្យានុរក្ស និងអ្នកពាក់ពន្ធ័នានា ដើម្បីបង្កើនសមត្ថភាពសហគមន៍តំបន់ការពារធម្មជាតិ ក្នុងការការពារជំងឺគ្រុនចាញ់ គ្រុនឈាម និងដង្កូវព្រូន និងចែកជូនសម្ភារៈការពារជំងឺ រួមចំណែកអនុវត្តផែនការយុទ្ធសាស្រ្តជាតិលុបបំបាត់ជំងឺគ្រុនចាញ់អោយមានប្រសិទ្ធភាពខ្ពស់ ដើម្បីឈានទៅលុបបំបាត់ជំងឺគ្រុនចាញ់ នៅក្នុងប្រទេសកម្ពុជានាឆ្នាំ២០២៥។

ថ្លែងនៅក្នុងឱកាសសំណេះសំណាលនេះ លោកជំទាវ ឌិត នីតា បានមានប្រសាសន៍ផ្ញើរការនឹករលឹក ការស្រលាញ់ ពីសំណាក់ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន ដែលតែងតែលើកឡើង ពីគុណបំណាច់ និងគំរូវីរភាពរបស់ មន្រ្តីឧទ្យានុរក្ស និងប្រជាសហគមន៍ទាំងអស់ ដែលបានយកអស់កំលាំងកាយចិត្ត ការពារព្រៃឈើ ធនធានធម្មជាតិ និង ជីវៈចម្រុះរបស់យើង ទុកជាមរតកសម្រាប់មនុស្សជំនាន់ក្រោយ។លោកជំទាវបានមានប្រសាសន៍បន្តថា ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោហ៊ុនសែន តែងតែគិតគូរពីសុខមាលភាពរបស់ប្រជាជនជាចម្បង ជាក់សែ្តង យុទ្ធនាការចាក់វ៉ាក់សាំងជូនប្រជាជនកម្ពុជារហូតក្នុងម្នាក់ ចំនួន ៣ដូស ដើម្បីបង្ការ ការពារ និងទប់ស្កាត់ជំងឺកូវីដ១៩ ។ តាមរយៈនេះ ជានិច្ចកាល ឯកឧត្តមរដ្ឋមន្រ្តីតែងតែគិតគូរពីសុខទុក្ខ និង សុខមាលភាពមន្រ្តីរាជការ ជាពិសេស បងប្អូនប្រជាសហគមន៍ និង មន្រ្តីឧទ្យានុរក្សធ្វើយ៉ាងណាទទួលបាននូវសម្ភារៈការពារ និងសុខភាពល្អ ជៀសឆ្ងាយពីជំងឺដង្កាត់ផ្សេងៗ ដើម្បីបំពេញកាតព្វកិច្ចការងារកាន់តែល្អ និងមិនខាតបង់សេដ្ឋកិច្ចគ្រួសារ។