ក្រសួងបរិស្ថានបើកកិច្ចប្រជុំវាយតម្លៃហេតុប៉ះពាល់បរិស្ថានលើក្រុមហ៊ុន ជីបម៉ុង

ក្រសួងបរិស្ថានបើកកិច្ចប្រជុំអន្តរក្រសួងស្ដីពីការពិនិត្យ និងផ្ដល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) លើគម្រោងធ្វើអាជីវកម្មថ្មសំណង់ របស់ក្រុមហ៊ុនជីបម៉ុង (Chip Mong Concrete ដែលគ្រប់គ្រងលើផ្ទៃដីទំហំ ១២៧ហិកតាស្ថិតនៅក្នុងភូមិបេង ឃុំស្តុក ស្រុកគងពិសី ខេត្តកំពង់ស្ពឺ។

កិច្ចប្រជុំនេះ​ផ្ដោតលើការ​ពិនិត្យ និងពិភាក្សាលើចំណុចសំខាន់ៗចំនួន០៦ចំណុចដែលរួមមាន ទី១ ការរៀបចំផែនការគ្រប់គ្រងទេសភាពក្នុងដំណាក់កាលរចនាគម្រោង ទី២ ការរំខានដោយសំឡេង និងគុណភាពខ្យល់ ជាពិសេសការហុយធូលី ដែលកើតចេញពីសកម្មភាពអាជីវកម្មដូចជាការបំផ្ទុះ ការកិន និងការដឹកជញ្ជូនថ្ម ទី៣ ការគ្រប់គ្រងសំណល់រឹង-រាវរបស់គម្រោង ជាពិសេសសំណល់រាវចេញពីទីតាំងស្តុកថ្ម ទីតាំងរណ្ដៅរ៉ែ និងទីតាំងស្តុកដីស្រទាប់លើ ទី៤ សុខភាព និងសុវត្ថិភាពរបស់កម្មករនិយោជិត និងប្រជាពលរដ្ឋ ដែលរស់នៅជុំវិញតំបន់គម្រោង ទី៥ ដំណោះស្រាយផលប៉ះពាល់ជាមួយប្រជាពលរដ្ឋនៅជុំវិញតំបន់គម្រោង និងការពិគ្រោះយោបល់ជាមួយអាជ្ញាធរ សហគមន៍ស្វាយរំពារ និងស្ថាប័នពាក់ព័ន្ធ និង ទី៦ ការត្រួតពិនិត្យទៅលើការប្រើប្រាស់ថវិកាមូលនិធិបរិស្ថាន និងសង្គម ដើម្បីរួមចំណែកដល់ការអភិវឌ្ឍប្រកបដោយចិរភាព។

កិច្ចប្រជុំនេះដឹកនាំដោយ ឯកឧត្ដម ទា ជុប អនុរដ្ឋលេខាធិការ នៃក្រសួងបរិស្ថាន និងជាប្រធានក្រុមការងារសម្របសម្រួលការវាយតម្លៃហេតុប៉ះពាល់បរិស្ថាន (ស.វ.ហ.ស្ថ.) និងមានតំណាងមកពីក្រសួង និងអាជ្ញាធរពាក់ព័ន្ធចំនួ១១ ចូលរួម​ផងដែរ។

ក្រោយកិច្ចពិភាក្សា ​ជា​លទ្ធ​ផល​អង្គប្រជុំ​បាន​សម្រេច​ស្នើសុំឱ្យក្រុមហ៊ុន ជីបម៉ុង ធ្វើផ្លូវមួយ​ខ្សែ​ផ្សេង​ចូលទៅកាន់តំបន់អាជីវកម្ម ជៀសវាង​រំខាន និងប៉ះ​ពាល់​​ដល់​ប្រជាពលរដ្ឋ ពី​សំឡេង កំទេចថ្ម ពិសេសការបំពុលពីធូលីជាដើម៕

អត្ថបទ​គួរអាន៖
១. ក្រសួងបរិស្ថាន ដឹកនាំកិច្ចប្រជុំលើការវាយតម្លៃហេតុប៉ះពាល់បរិស្ថាននិងសង្គមលើក្រុមហ៊ុន២