ការរៀបចំគម្រោង“ការលើកកម្ពស់ការគ្រប់គ្រងទឹកក្រោមដីឆ្លងដែនប្រកបដោយចីរភាពរវាងតំបន់ទំនាបទន្លេមេគង្គនៃប្រទេសកម្ពុជា និងដែនដីសណ្តរនៃតំបន់មេគង្គវៀតណាម”

កិច្ចពិភាក្សាពិគ្រោះយោបល់ថ្នាក់ជាតិ ស្តីពីការរៀបចំគម្រោង “ការលើកកម្ពស់ការគ្រប់គ្រងទឹកក្រោមដីឆ្លងដែនប្រកបដោយចីរភាពរវាងតំបន់ទំនាបទន្លេមេគង្គនៃប្រទេសកម្ពុជា និងដែនដីសណ្តរនៃតំបន់មេគង្គវៀតណាម” ហៅកាត់ថា PIF បានប្រព្រឹត្តទៅនៅថ្ងៃចណ្ទ ទី២៥ ខែឧសភា ឆ្នាំ២០២១ តាមរយះប្រព័ន្ធអនឡាញ (Zoom conference Call) ដោយមានការសម្របសម្រួលពីអគ្គនាយកដ្ឋានចំណេះដឹងនិងព័ត៌មានបរិស្ថាន នៃក្រសួងបរិស្ថាន សហការជាមួយ អង្គការស្បៀងនិងកសិកម្មសហប្រជាជាតិ FAO និងមានការចូលរួមពីថ្នាក់ដឹកនាំ តំណាងក្រសួង ស្ថាប័នពាក់ព័ន្ធ មន្រ្តីជំនាញ អ្នកស្រាវជ្រាវ និងដៃគូអភិវឌ្ឍន៍ជាច្រើននាក់។ កិច្ចពិគ្រោយោបល់នេះ រៀបចំឡើងក្នុងគោលបំណងប្រមូលធាតុចូលដើម្បីឯកសារគម្រោងមានលក្ខណៈពេញលេញគ្រប់ជ្រុងជ្រោយ ស្របគ្នាជាមួយគោលនយោបាយជាតិ និយុទ្ធសាស្រ្តអភិវឌ្ឍរបស់កម្ពុជា និងធ្វើឲ្យប្រសើរឡើងជីវភាពរស់នៅរបស់ប្រជាពលរដ្ឋ។ ឯកឧត្តម ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន និងជាប្រធានសម្របសម្រួលគម្រោង បានឱ្យដឹងថា គម្រោងបង្កើតឡើង ដើម្បីពង្រឹងនិរន្តរភាពបរិស្ថាននិងសន្តិសុខទឹកក្នុងអាងទន្លេមេគង្គក្រោមដោយផ្តោតជាលើកដំបូងលើការធ្វើឱ្យប្រសើរឡើងនូវអភិបាលកិច្ចនិងការប្រើប្រាស់ទឹកក្រោមដីប្រកបដោយនិរន្តរភាពនៃទំនាបទន្លេមេគង្គនឹងដែនដីសណ្តរទន្លេមេគង្គ។