ក្រសួងបរិស្ថាន រៀបចំពិព័រណ៍សហគមន៍ ក្នុងគោលបំណង អភិវឌ្ឍមុខរបរ និងលើកស្ទួយជីវភាពប្រជាសហគមន៍

លោកជំទាវរដ្ឋលេខាធិការ បានមានប្រសាសន៍គន្លឹះថា ការលើកម្ពស់ជីវភាពសហគមន៍ត្រូវធ្វើឡើងឲ្យមាននិរន្តរភាព ដែលនេះគឺជាគោលបំណងសំខាន់នៃពិព័រណ៍សហគមន៍ ធ្វើយ៉ាងណាឲ្យប្រជាពលរដ្ឋ មានមុខរបរ ជំនាញ ចំណូល និងមានជម្រើស ជៀសវាងការពឹងផ្អែកលើធនធានធម្មជាតិទាំងស្រុង។ ទន្ទឹមនេះ សហគមន៍តំបន់ការពារធម្មជាតិ ទទួលសិទ្ធស្របច្បាប់ក្នុងការចូលរួមគ្រប់គ្រងធនធានធម្មជាតិ សិទ្ធិប្រើប្រាស់ និងសិទ្ធិដកហូតផល-អនុផលព្រៃឈើស្របច្បាប់ តាមផែនការគ្រប់គ្រងសហគមន៍ និងមានជម្រើសមុខរបរចិញ្ចឹមគ្រួសារ ដូចជា ការធ្វើកសិកម្ម ចិញ្ចឹមសត្វ ដាំដំណាំ និងការផ្ដល់សេវាទេសចរណ៍ធម្មជាតិ ដើម្បីលើកកម្ពស់ជីវភាពឲ្យមានលក្ខណៈល្អប្រសើរ។

គម្រោងរៀបចំពិព័រណ៍សហគមន៍នេះ ទទួលបានការគាំទ្រពីក្រសួងស្ថាប័ន អាជ្ញាធរដែនដី អង្គការដៃគូ ក្រុមហ៊ុន និងវិស័យឯកជន ដែលបានចូលរួមក្នុងកិច្ចប្រជុំ។ អ្នកចូលរួមទាំងអស់ ត្រៀមខ្លួនចូលរួមអនុវត្តគម្រោងនេះឲ្យបានជោគជ័យ សម្រាប់ជាប្រយោជន៍ពិតប្រាកដ្ឋដល់ប្រជាសហគមន៍ ជាពិសេសការផ្តល់ការបណ្ដុះបណ្ដាលជំនាញ មុខរបរ ដល់សហគមន៍ និងចូលរួមជួយគៀគរថវិកា ដៃគូរ និងសហគមន៍ផ្សេងៗ ឲ្យចូលរួមពិព័រណ៍សហគមន៍នេះ ដែលនឹងត្រូវរៀបចំឡើងនៅខេត្តកំពង់ធំ ក្នុងមេសា ឆ្នាំ២០២២ ខាងមុខ។

គួរឲ្យដឹងថា គម្រោងរៀបចំពិព័រណ៍សហគមន៍ ត្រូវបានសម្របសម្រួលរៀបចំឡើងដោយ អគ្គនាយកដ្ឋានសហគមន៍មូលដ្ឋាន ក្រសួងបរិស្ថាន ក្នុងគោលបំណងលើកកម្ពស់ជីវភាពសហគមន៍ គ្រប់គ្រងធនធានធម្មជាតិ ថែរក្សាវប្បធម៌ ប្រពៃណី ទំនៀមទម្លាប់ ជំនឿ សាសនាជនជាតិដើមភាគតិច ដោយរៀបចំឡើង នៅតាមខេត្តគោលដៅដែលមានសហគមន៍តំបន់ការពារធម្មជាតិ និងសហគមន៍មូលដ្ឋានផ្សេងទៀត។ សម្រាប់ការចាប់ផ្តើមដំបូង ខេត្តកំពង់ធំ ជាខេត្តគោលដៅដំបូងសម្រាប់ការរៀបចំពិព័រណ៍នេះ នៅខែមេសា ឆ្នាំ២០២២ ខាងមុខ ក្នុងនោះ ក្រុងស្ទឹងសែន ជាទីកន្លែងប្រារព្ធការតាំងពិព័រណ៍។