គណៈប្រតិភូនៃអគ្គលេខាធិការដ្ឋាន ក.ជ.អ.ច. អញ្ជើញត្រួតពិនិត្យដំណើរការសាងសង់សួនកេសរកូលព្រៃ (អ័រគីដេ)
ថ្ងៃ ពុធ, 15 សីហា, 2018នៅព្រឹកថ្ងៃទី៩ ខែសីហា ឆ្នាំ២០១៨ ឯកឧត្ដម ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) អមដំណើរដោយលោកជំទាវ ចាន់ សុម៉ាលី អគ្គលេខាធិការរង បានដឹកនាំគណៈប្រតិភូនៃអគ្គលេខាធិការដ្ឋាន ក.ជ.អ.ច. អញ្ជើញត្រួតពិនិត្យដំណើរការសាងសង់សួនកេសរកូលព្រៃ (អ័រគីដេ) ដំបូងគេបង្អស់នៅកម្ពុជា មានទីតាំងស្ថិតនៅជើងភ្នំគូលែន ខេត្តសៀមរាប។
សួនកេសរកូលព្រៃភ្នំគូលែន មានទីតាំងនៅជើងភ្នំគូលែន ក្បែស្នាក់ការបរិស្ថាន ដែលមានទំហំ២៥ម៉ែត្រ គុណ ៣៥ម៉ែត្រ ដែលអាចផ្ទុកកេសរកូលបានប្រមាណពី១៥០០០-២០០០០ដើម និងរក្សាទុកកេសរកូលបានប្រមាណ២០០០ប្រភេទ សម្រាប់តំបន់ភ្នំគូលែនផ្ទាល់ អាចមានប្រភេទកេសរកូលពី១០០-២០០ ប្រភេទ។ សួននេះត្រូវបានផ្តួចផ្តើមសាងសង់ឡើងដោយនាយកដ្ឋានជីវៈចម្រុះ នៃក.ជ.អ.ច. សហការជាមួយលោក នួន មុនី ប្រធានមន្ទីរបរិស្ថានខេត្តសៀមរាប និងលោក សុខ វិជ្ជា ម្ចាស់កសិដ្ឋាន The Bloom Garden Greenhouse ក្នុងគោលបំណងដើម្បីការពារ
សង្គ្រោះ និងអភិរក្សប្រភេទកេសរកូលព្រៃកម្ពុជា ដែលទទួលរងការគំរាមកំហែង និងជិតផុតពូជពីព្រៃធម្មជាតិ ជាពិសេសនឹងក្លាយជាទីកន្លែងសិក្សាស្រាវជ្រាវ និងអភិរក្សក្រៅតំបន់ផងដែរ។ នាថ្ងៃអនាគតសួនកេសកូលព្រៃនេះ ក៏នឹងត្រូវបានពង្រឹងឱ្យក្លាយទៅជាគោលដៅទេសចរណ៍ធម្មជាតិថ្មីមួយទៀតក្នុងតំបន់ភ្នំគូលែន ដែលអាចទាញយកចំណូលពីការចូលទស្សនារបស់ភ្ញៀវដើម្បីទ្រទ្រង់ដំណើរការប្រតិបត្តិការរបស់សួនតែម្ដង។ ហើយបច្ចុប្បន្នការងារសាងសង់សម្រេចបានប្រមាណ៨០% ហើយ ដោយបានរៀបចំស្រះទឹកបែបធម្មជាតិ និងមានផែនការរៀបចំថ្នាលបណ្ដុះ ថ្នាលតាំងបង្ហាញ និងឌីសាញផ្នែកខាងក្នុងជាបន្តបន្ទាប។
ក្នុងឱកាសចុះត្រួតពិនិត្យការសាងសង់នេះ ឯកឧត្ដម ទិន ពន្លក អគ្គលេខាធិការដ្ឋាន ក.ជ.អ.ច. បានកោតសរសើរចំពោះនាយកដ្ឋានជីវៈចម្រុះ ដែលបានសហការល្អជាមួយមន្ទីរបរិស្ថានខេត្តសៀមរាប និងម្ចាស់កសិដ្ឋាន The Bloom Garden Greenhouse រៀបចំសាងសង់សួននេះឡើង។ ឯកឧត្ដម បានចាត់ទុកសួនថ្មីនេះ នឹងក្លាយជាសួនកេសរកូលព្រៃធំដំបូងគេបង្អស់នៅកម្ពុជា ដែលរួមចំណែកក្នុងការការពារ និងអភិរក្សធនធានធម្មជាតិ និងជីវៈចម្រុះរបស់ប្រទេសកម្ពុជា។ ឯកឧត្ដមក៏ បានលើកទឹកចិត្តឱ្យគ្រប់ភាគីពាក់ព័ន្ធទាំងអស់ត្រូវបន្តខិតខំធ្វើការសិក្សាស្រាវជ្រាវលើប្រភេទកេសរកូលព្រៃបន្តទៀត ដែលនេះគឺជាផ្នែកដ៏សំខាន់ក្នុងការគាំទ្រដល់ការអនុវត្តអនុសញ្ញាអន្តរជាតិស្តីពីជីវៈចម្រុះ និងពិធីសារណាហ្គូយ៉ាស្តីពីABS៕
