កិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើគម្រោងអាជីវកម្មខ្សាច់សំណង់ និងដីល្បាយខ្សាច់នៅខេត្តកំពង់ចាម
ថ្ងៃ ពុធ, 19 ធ្នូ, 2018នៅទីស្តីការក្រសួងបរិស្ថាន នៅព្រឹកថ្ងៃចន្ទ ១០កើត ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែធ្នូ ឆ្នាំ២០១៨ លោកជំទាវ ម៉ុម ថានី រដ្ឋលេខាធិការនៃក្រសួងបរិស្ថាន បានដឹកនាំកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង សម្រាប់គម្រោងអាជីវកម្មខ្សាច់សំណង់ និងដីល្បាយខ្សាច់ នៅលើផ្ទៃដីទំហំ ២០ហិកតា ដែលមាន ទីតាំងស្ថិតនៅតាមដងទន្លេមេគង្គ ក្នុងភូមិកោះប៉ែន ឃុំកោះមិត្ត ស្រុកកំពង់សៀម ខេត្តកំពង់ចាម របស់សហគ្រាស កង ម៉ារ៉ែន ដែលបានសិក្សាវាយតម្លៃដោយក្រុមហ៊ុនទីប្រឹក្សា ស៊ី អ៊ី អេស ខូ អិលធីឌី។
កិច្ចប្រជុំនេះមានការចូលរួមពីតំណាងឯកឧត្តមអនុរដ្ឋលេខាធិការ អគ្គនាយកដ្ឋានពាក់ព័ន្ធនៃក្រសួងបរិស្ថាន តំណាងក្រសួងរៀបចំដែនដី នគរូបនីយកម្ម និងសំណង់ ក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ និងថាមពល ក្រសួងសាធារណៈការ និងដឹកជញ្ជូន ក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ ក្រសួងការងារ និងបណ្តុះបណ្តាលវិជ្ជាជីវៈ ក្រសួងវប្បធម៌ និងវិចិត្រសិល្បៈ ក្រុមប្រឹក្សាអភិវឌ្ឍន៍កម្ពុជា រដ្ឋាបាលខេត្តកំពង់ចាម មន្ទីរបរិស្ថានខេត្តកំពង់ចាម តំណាងនាយកដ្ឋានវាយតម្លៃហេតុប៉ះពាល់បរិស្ថាន តំណាងអង្គការ DPA តំណាងម្ចាស់គម្រោង និងក្រុមហ៊ុនទីប្រឹក្សា។
កិច្ចប្រជុំនេះ បានសម្រេចលទ្ធផលសំខាន់ៗរួមមាន (១). អង្គប្រជុំគាំទ្រគម្រោងអាជីវកម្មខ្សាច់សំណង់ និងដីល្បាយខ្សាច់នេះ (២). ត្រូវកំណត់បរិមាណនៃការធ្វើអាជីវកម្មបូមខ្សាច់ក្នុង ០១ឆ្នាំ ឱ្យបានលម្អិត (៣). ត្រូវផ្អាក ឬកាត់បន្ថយសកម្មភាពអាជីវកម្មនៅក្នុងរដូវត្រីពងកូន (៤). ត្រូវដាំដើមឈើនៅ ទីតាំងការដ្ឋានស្តុកខ្សាច់ និងការដឹកជញ្ជូនខ្សាច់ត្រូវគ្របប៉ាតង់ឱ្យបានត្រឹមត្រូវ ដើម្បីកាត់បន្ថយការហុយធូលី ព្រមទាំងគោរពច្បាប់ស្តីពីចរាចរណ៍ផ្លូវគោក និងច្បាប់ស្តីពីផ្លូវថ្នល់ (៥). ត្រូវបំពាក់ប្រព័ន្ធ GPS នៅពេលបូមខ្សាច់ និងស្លាកលេខទូកបូមខ្សាច់ ដើម្បីងាយស្រួលតាមដានសកម្មភាពបូមរបស់សហគ្រាស និង (៦). ត្រូវសហការជាមួយក្រុមហ៊ុនទីប្រឹក្សាធ្វើការកែសម្រួលនូវចំណុចខ្វះខាតនៅក្នុងរបាយការណ៍វាយតម្លៃហេតុប៉ះពាល់បរិស្ថាននិងសង្គមដំបូងសម្រាប់គម្រោងនេះ ដែលសមាជិកអង្គប្រជុំបានផ្តល់យោបល់។
