ការចូលរួមរបស់យុវជនគឺជាកូនសោដ៏សំខាន់ក្នុងកិច្ចការការពារបរិស្ថាន
ថ្ងៃ អាទិត្យ, 6 វិច្ឆិកា, 2016នៅរសៀលថ្ងៃទី៦ ខែវិច្ឆិកា ដែលជាថ្ងៃបញ្ចប់ នៃព្រឹត្តិការណ៍ពិព័រណ៍ការងារថ្នាក់ជាតិលើកទី៦ ឆ្នាំ២០១៦ ក្រសួងបរិស្ថានរួមជាមួយទីភ្នាក់ងារជាតិមុខរបរនិងការងារ នៃក្រសួងការងារ និងបណ្តុះបណ្តាលវិជ្ជាជីវ: និងសហភាពសហព័ន្ធយុវជនកម្ពុជា បានរៀបចំវេទិកាធ្វើបទបង្ហាញស្តីពីការអភិវឌ្ឍសហគមន៍មូលដ្ឋាន ជំនាញបច្ចេកវិទ្យាបៃតង ការអភិវឌ្ឍសេដ្ឋកិច្ចបៃតង ទៅដល់យុវជនជាសិស្ស និស្សិត ដែលមកពីស្រុកអូររាំងឪ ខេត្តត្បូងឃ្មុំ ប្រមាណជាង១០០នាក់ រួមនិងយុវជនជាសិស្ស និស្សិត និងសាធារណជនដែលចូលរួមទស្សនាពិព័រណ៌ផ្ទាល់ផងដែរ គ្រាដែលវាគ្មិននៅក្នុងវេទិកានេះ គឺមានឯកឧត្តម កែន សេរីរដ្ឋា អគ្គលេខាធិការរងក្រុមប្រឹក្សាជាតិអភិវឌ្ឍន៍ដោយចីរភាព និងឯកឧត្តម ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាន ក្រសួងបរិស្ថាន។
គោលបំណងសំខាន់ដែលរៀបចំឱ្យមានវេទិកានាពេលនេះ គឺចង់បង្ហាញដល់សិស្ស និស្សិត និងអ្នកចូលរួមទាំងអស់យល់ជ្រាបកាន់តែច្បាស់ចំពោះការចូលរួមក្នុងការថែរក្សានូវធនធានធម្មជាតិ ក៏ដូចជាបង្ហាញផ្លូវដល់ពួកគាត់លើការសម្រេចចិត្តស្វែងរក និងជ្រើសរើសការងារធ្វើ។ មិនតែប៉ុណ្ណោះ វាគ្មិនទាំងពីរ ក៏បានបង្ហាញពីការ ជ្រើសរើសមុខជំនាញដែលទាក់ទងទៅនឹងការអភិវឌ្ឍសហគមន៍ ដើម្បីលើកកម្ពស់កម្រិតជីវភាពសហគមន៍ និងការថែរក្សាធនធានធម្មជាតិផងដែរ។ ហើយជាងនេះទៅទៀត ការងារសំខាន់ៗ និងសមិទ្ធផលជាច្រើនដែលក្រសួងបរិស្ថានសម្រេចបាន ក៏ត្រូវបានលើកយកមកបង្ហាញនៅក្នុងវេទិកានារសៀលនេះទៀតផង៕
ព័ត៌មានបន្ថែម
