ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងជាប្រធានក្រុមការងារ បានដឹកនាំកិច្ចប្រជុំជាមួយឯកឧត្តម សុខ លូ អភិបាល នៃគណ:អភិបាលខេត្តកំពង់ធំ
ថ្ងៃ អង្គារ, 29 កញ្ញា, 2020កាលពីថ្ងៃចន្ទ ១១កើត ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែកញ្ញាឆ្នាំ២០២០ នៅសាលាខេត្តកំពង់ធំ ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងជាប្រធានក្រុមការងារ បានដឹកនាំកិច្ចប្រជុំជាមួយឯកឧត្តម សុខ លូ អភិបាល នៃគណ:អភិបាលខេត្តកំពង់ធំ ដោយមានការចូលរួមពីថ្នាក់ដឹកនាំ មន្រ្តីជំនាញ និងអាជ្ញាធរមូលដ្ឋានពាក់ព័ន្ធជាសមាជិកក្រុមការងារ ដើម្បីពិនិត្យ សិក្សា ចងក្រងឯកសារទីតាំងដីកាត់ឆ្វៀលជូនប្រជាពលរដ្ឋដែលបានប្រើប្រាស់ និងអាស្រ័យផលជាក់ស្តែងយូរឆ្នាំ ក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ស្ថិតក្នុងភូមិសាស្ត្រខេត្តកំពង់ធំ។ កិច្ចប្រជុំបានពិនិត្យ ពិភាក្សាអំពីវឌ្ឍនភាពនៃការចងក្រងឯកសារទីតាំងស្នើសុំកាត់ឆ្វៀល ពិសេសគឺទិន្នន័យនៃការប្រើប្រាស់ដី ការកសាងសេចក្តីព្រាងផែនទីទីតាំងស្នើសុំកាត់ឆ្វៀល ការប្រឈមចំពោះមុខ សំណូមពរ កិច្ចសហការ និងទិសដៅការងារបន្ត ដើម្បីពន្លឿនការចងក្រងទិន្នន័យទីតាំងដីស្នើសុំកាត់ឆ្វៀល និងការរៀបចំរបាយការណ៍ជូនថ្នាក់ដឹកនាំក្រសួងបរិស្ថានពិនិត្យសម្រេចតាមនីតិវិធី៕
