ឯកឧត្តម សាយ សំអាល់៖ មន្រ្តីរាជការជាកូនចៅរបស់ប្រជាជន ដែលរស់នៅជាមួយប្រជាជន ដេីម្បីចូលរួមលេីកកម្ពស់ជីវភាពប្រជាជន
ថ្ងៃ អាទិត្យ, 6 កុម្ភៈ, 2022នៅក្នុងឱកាសចុះជួបសំណេះសំណាល និងពិសារអាហារសាមគ្គីជាមួយមន្ត្រីឧទ្យានុរក្ស និងមន្រ្តីរាជការនៃមន្ទីរបរិស្ថានក្រចេះ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា មន្រ្តីរាជការត្រូវប្រកាន់ភ្ជាប់ការគោរពឋានានុក្រមការងារ និងអនុវត្តនូវការរៀបចំនិងប្រព្រឹត្តទៅរបស់អង្គភាពខ្លួន ជាពិសេសត្រូវចាត់ទុកខ្លួនថាជាកូនចៅរបស់ប្រជាជន ដែលរស់នៅជាមួយប្រជាជន ដេីម្បីចូលរួមលេីកកម្ពស់ជីវភាពប្រជាជន និងការអភិវឌ្ឍសហគមន៍មូលដ្ឋាន។
ក្នុងពិធីសំណេះសំណាលដែលបានប្រព្រឹត្តទៅនាព្រឹក ថ្ងៃទី០៦ ខែកុម្ភៈ ឆ្នាំ២០២២នេះ ឯកឧត្តមរដ្ឋមន្រ្តី បានបន្តទៀតថា ដើម្បីជាការលើកស្ទួយជីវភាពប្រជាសហគមន៍បន្ថែម យើងអាចធ្វើបាន តាមរយៈការលើកទឹកចិត្តឱ្យពួកគាត់ដាំដំណាំរួមផ្សំបន្ថែម ឬបន្លែបង្ការប្រចាំថ្ងៃ ការជំរុញឱ្យមានកិច្ចសហការជាមួយដៃគូអភិវឌ្ឍន៍ ដេីម្បីគាំទ្រ ផ្សព្វផ្សាយ និងអភិវឌ្ឍតំបន់ទេសចរណ៍ធម្មជាតិ។ បន្ថែមលេីសពីនេះ ឯកឧត្តមរដ្ឋមន្ត្រី បានលេីកទឹកចិត្តឱ្យមានគំនិតផ្តួចផ្តេីមបន្ថែមលេីយន្តការអនុវត្តគោលនយោបាយភូមិ ឃុំ សង្កាត់មានសុវត្ថិភាព ដែលសំដៅលេីការពង្រឹងការគ្រប់គ្រងសំណល់រឹងសំរាម និងចលនាសាលាមេត្រីបរិស្ថាន ក៏ដូចជាអារាមបរិស្ថាន។
