រដ្ឋមន្រ្តីក្រសួងបរិស្ថាន គាំទ្រគំនិតផ្តួចផ្តើមថ្មីរបស់ UNESCO លើកកំពស់ជីវភាពប្រជាសហគមន៍

ឯកឧត្តមបណ្ឌិត អ៊ាង សុផល្លែត បានគាំទ្រលើគំនិតផ្តួចផ្តើមថ្មីជាមួយអង្គការ UNESCO រួមមានការលើកកំពស់ជីវភាពប្រជាសហគមន៍តាមរយៈទេសចរណ៍ធម្មជាតិ និងប្រវត្តិសាស្រ្ត ការចិញ្ចឹម និងការអភិរក្សឃ្មុំព្រៃ ប្រកបដោយចីរភាព និងគម្រោងទឹកក្រោមដីឆ្លងដែន ដើម្បីឆ្លេីយតបទៅនឹងការប្រែប្រួលអាកាសធាតុ។

លោក Sardar Umar Alam បានគូសបញ្ជាក់ពីកិច្ចសហប្រតិបត្តិការដ៏ល្អ រវាងក្រសួងបរិស្ថាន និងអង្គការ UNESCO ក្នុងការពង្រឹងការអភិរក្សជីវមណ្ឌលបឹងទន្លេសាប នៅតំបន់រ៉ាមសារបឹងទន្លេឆ្មា តំបន់រ៉ាមសារស្ទឹងសែន និងការអប់រំផ្សព្វផ្សាយបរិស្ថាន ហើយអង្គការ UNESCO ក៏មានគម្រោងបន្ស៊ាំនឹងការប្រែប្រួលអាកាសធាតុ ពីមូលនិធិប្រទេសដែលមានការអភិវឌ្ឍតិចតួច (LDCF) លើការគ្រប់គ្រងទឹក ជាមួយក្រសួងបរិស្ថានផងដែរ។

ជាមួយកិច្ចសហប្រតិបត្តិការនេះ ឯកឧត្តមរដ្ឋមន្រ្តីបានជំរុញឱ្យមានកិច្ចសហការបន្ថែមទៀត លើកិច្ចការពារ និងអភិរក្សធនធានធម្មជាតិ និងបេតិកភណ្ឌនៅកម្ពុជា ការរៀបចំបច្ចុប្បន្នភាព នៃការគ្រប់គ្រងតំបន់ និងការអភិរក្សជីវៈចម្រុះ រៀបចំដាំស្តារព្រៃលិចទឹកឡើងវិញ និងរៀបចំផែនការយុទ្ធសាស្រ្ត សម្រាប់គ្រប់គ្រងតំបន់ឋបនីយជីវមណ្ឌលបឹងទន្លេសាប ប្រកបដោយនិរន្តរភាព។

សូមជម្រាបជូនថា ជំនួបរវាងឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និង តំណាងអង្គការ UNESCO ប្រចាំនៅកម្ពុជានេះ ធ្វើឡើងទីស្តីការក្រសួងបរិស្ថាន នាថ្ងៃទី១៨ ខែកញ្ញា ឆ្នាំ២០២៣ ។