រដ្ឋមន្ត្រីបរិស្ថាន៖ ការបង្កើតឧទ្យានជាតិសមុទ្រកោះរ៉ុងជាការចូលរួមចលនាអភិរក្សទាំងក្នុងស្រុក តំបន់ និងអន្តរជាតិ
ថ្ងៃ ពុធ, 28 កុម្ភៈ, 2018ក្នុងបទសម្ភាសន៍ជាមួយទូរទស្សន៍អប្សរា រដ្ឋមន្ត្រីបរិស្ថាន ឯកឧត្តម សាយ សំអាល់ បានលើកឡើងថា ការដាក់បញ្ចូលតំបន់កោះរ៉ុងជាឧទ្យានជាតិកាលពីពេលថ្មីៗនេះ គឺជាចលនាចូលរួមការអភិរក្សក្នុងស្រុក ក្នុងតំបន់ និងអន្តរជាតិ។ ជាកិច្ចសម្ភាសន៍ដែលធ្វើឡើងនៅទីស្តីការក្រួសបរិស្ថាននៅថ្ងៃទី២៦ ខែកុម្ភៈ ឆ្នាំ២០១៨នេះ។
ឯកឧត្តមរដ្ឋមន្ត្រីបានថ្លែងថា៖ “ការដាក់បញ្ចូល គឺជាការចូលរួមចលនាអភិរក្សធនធានធម្មជាតិក្នុងស្រុក តំបន់ និងអន្តរជាតិ។កោះរ៉ុងជាកោះដែលមានតម្លៃជីវសាស្ត្រខ្ពស់គួរសមដែលមានរុក្ខជាតិ និងធនធានធម្មជាតិកម្រដែលអាចមិនមាននៅកន្លែងផ្សេងទៀត”។
បន្ថែមពីនេះ តំបន់កោះរ៉ុង គឺជាចរាចរណ៍មច្ឆរាពីឈូងសមុទ្រថែ មកកម្ពុជា វាជាជម្រកសត្វមួយធំសម្រាប់ការផ្តល់ធនធានជលផលដល់ប្រជានេសាទ។ ទន្ទឹមនឹងនេះតំបន់កោះរ៉ុង មានផ្កាថ្មដ៏ស្រស់ស្អាតដែលកម្ពុជាត្រូវការអភរិក្សសម្រាប់កំណើនទេសចរណ៍ជាអតិបរមាបើទោះបីកម្ពុជាមានតំបន់ផ្កាថ្មជាច្រើនផ្សេងទៀតក៏ដោយ។ សូមរំលឹកថា រាជរដ្ឋាភិបាលកម្ពុជាតាមរយៈសំណើក្រសួងបរិស្ថាន កាលពីថ្ងៃទី០៨ ខែកុម្ភៈ បានដាក់បញ្ចូលផ្ទៃដី៥២,៤៩៨ ហិកតាដែលគ្របដណ្តប់កោះចំនួន៧ក្នុងខេត្តព្រះសីហនុ និងខេត្តកោះកុង រួមមានកោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្ចាស់ក្រៅ កោះម្ចាស់ក្នុង និងសមុទ្រជុំវិញ៕
