ឯកឧត្តមបណ្ឌិត អ៊ាង សុផល្លែត ទទួលជួបពិភាក្សាការងារជាមួយថ្នាក់ដឹកនាំក្រុមហ៊ុន Ecosphere និង Royal Group អំពីទីផ្សារឥណទានកាបូន និងក្របខ័ណ្ឌបញ្ជាក់ថាមពលកកើតឡើងវិញ

នៅរសៀលថ្ងៃទី១១ ខែមិថុនា ឆ្នាំ២០២៦ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានទទួលជួបលោក RAVI CHIDAMBARAM អគ្គនាយកប្រតិបត្តិ (CEO) នៃក្រុមហ៊ុន Ecosphere និងអ្នកឧកញ៉ា គិត ម៉េង ប្រធានក្រុមប្រឹក្សាភិបាល និងជានាយកប្រតិបត្តិនៃក្រុមហ៊ុន Royal Group ដើម្បីពិភាក្សាអំពីការអភិវឌ្ឍទីផ្សារឥណទានកាបូននៅកម្ពុជា (Cambodia Carbon Credit Market) និងការរៀបចំក្របខ័ណ្ឌបញ្ជាក់ប្រភពថាមពលកកើតឡើងវិញ (Renewable Certification Framework)។

ក្នុងជំនួបនេះ ភាគីទាំងអស់បានផ្លាស់ប្តូរទស្សនៈ និងពិភាក្សាអំពីឱកាសនៃការលើកកម្ពស់ទីផ្សារឥណទានកាបូននៅកម្ពុជា ការទាក់ទាញការវិនិយោគបៃតង និងការគាំទ្រដល់វិស័យឯកជនក្នុងការចូលរួមកាត់បន្ថយការបញ្ចេញឧស្ម័នផ្ទះកញ្ចក់ ស្របតាមគោលដៅអភិវឌ្ឍន៍ប្រកបដោយចីរភាព និងការប្តេជ្ញាចិត្តរបស់កម្ពុជាក្នុងការឆ្លើយតបនឹងការប្រែប្រួលអាកាសធាតុ។

ឯកឧត្តមរដ្ឋមន្ត្រីបានស្វាគមន៍ចំពោះការចាប់អារម្មណ៍ និងការចូលរួមរបស់វិស័យឯកជនក្នុងការជំរុញហិរញ្ញវត្ថុបៃតង និងការអភិវឌ្ឍយន្តការគាំទ្រទីផ្សារកាបូន ដែលអាចរួមចំណែកដល់ការអភិរក្សធនធានធម្មជាតិ ការកាត់បន្ថយការបញ្ចេញកាបូន និងការលើកកម្ពស់ការអភិវឌ្ឍសេដ្ឋកិច្ចបៃតងនៅកម្ពុជា។