វេទិកាសាធារណៈ ស្តីពីការដោះស្រាយប៉ះពាល់សំណល់ផេះធ្យូងថ្មមកលើប្រជាពលរដ្ឋនៅស្រុកស្ទឹងហាវ ខេត្តព្រះសីហនុ
ថ្ងៃ ពុធ, 4 មិនា, 2020កាលពីថ្ងៃទី៤ ខែមីនា ឆ្នាំ២០២០ វេលាម៉ោង ៩:០០ព្រឹក នៅសាលប្រជុំតូចនៃសាលាស្រុកស្ទឹងហាវ មានបើកវេទិកាសាធារណៈ ស្តីពីការដោះស្រាយប៉ះពាល់សំណល់ផេះធ្យូងថ្មមកលើប្រជាពលរដ្ឋនៅស្រុកស្ទឹងហាវ ខេត្តព្រះសីហនុ ក្រោមអធិបតីភាពឯកឧត្តម សៅ សុភាព រដ្ឋលេខាធិការ នៃក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះជួយស្រុកស្ទឹងហាវ ដោយមានការចូលរួមពីតំណាងរដ្ឋបាលស្រុក អង្គភាពពាក់ព័ន្ធស្រុកស្ទឹងហាវ អាជ្ញាធរភូមិ-ឃុំ តំណាងប្រជាពលរដ្ឋដែលរងប៉ះពាល់ តំណាងក្រុមហ៊ុន ស៊ី ម៉ៅ ត្រេឌីង ក្រុមហ៊ុន C.I.I.D.G ERDOS HONGJUN POWER CO., LTD. ក្រុមហ៊ុន CAMBODIAN ENERGY LIMITED និងក្រុមហ៊ុន CHINA HUADIAN LOWER STUNG RUSSEI CHRUM HYDRO-ELECTRIC PROJECT (CAMBODIA) COMPANY LIMITED សរុបចំនួន ៣៣នាក់។
ជាកិច្ចចាប់ផ្តេីមវេទិកាសាធារណ: ឯកឧត្តមប្រធានបានលេីកឡេីងអំពីការយកចិត្តទុកដាក់របស់រាជរដ្ឋាភិបាល ក៏ដូចជាក្រសួងបរិស្ថានលេីសុខទុក្ខរបស់ប្រជាពលរដ្ឋ ហេីយក៏បានផ្តល់ឱកាសដល់អាជ្ញាធរមូលដ្ឋាន និងតំណាងប្រជាពលរដ្ឋលេីកឡេីងអំពីកង្វល់ បញ្ហាប្រឈម និងផលប៉ះពាល់នានា ពីមូលដ្ឋានកែច្នៃសំណល់ផេះធ្យូងថ្ម របស់ក្រុមហ៊ុន ស៊ី ម៉ៅ ត្រេឌីង ដែលក្នុងនោះបញ្ហាប្រឈម និងសំណូមពរដែលត្រូវបានលើកឡើង រួមមាន៖
១. ប្រជាជននៅភូមិ២ និងភូមិ៣ នៃឃុំអូរត្រេះបានទទួលរងការប៉ះពាល់ដល់ការរស់នៅប្រចាំថ្ងៃពីការ ហុយធូលីផេះធ្យូងថ្មនេះអស់រយៈពេលលជាច្រេីនឆ្នាំមកហើយ
២. មានការរំខានដោយសំឡេង និងរំញ័រដល់ប្រជាជនដែលរស់នៅក្បែរទីតាំងរបស់ក្រុមហ៊ុន
៣. សំណល់រាវដែលហូរចេញពីគំនរផេះបានធ្វើឱ្យប៉ះពាល់ដល់គុណភាពទឹកព្រែករលួស និងមុខរបរចិញ្ចឹមត្រីរបស់ប្រជាជន
៤. ប្រជាជនសំណូមពរឱ្យក្រុមហ៊ុនប្តូរទីតាំងថ្មី ព្រោះមានការប៉ះពាល់ដល់សុខភាព និងរំខានដល់ការរស់នៅរបស់ពួកគាត់ជាយូរមកហើយ។
បន្ទាប់មកឯកឧត្តមប្រធានបានឱ្យតំណាងក្រុមហ៊ុន ស៊ី ម៉ៅ ត្រេឌីង លើកឡើងពីការដោះស្រាយទៅលើសំណូមពររបស់ប្រជាពលរដ្ឋ និងអាជ្ញាធរ មូលដ្ឋាន ព្រមទាំងការឆ្លើយតបទៅនឹងលិខិតលេខ ១១៧០ សជណ ប.ស្ថ ចុះថ្ងៃទី១១ ខែកញ្ញា ឆ្នាំ២០១៩ របស់ក្រសួងបរិស្ថានផងដែរ។
ជារួម ក្រុមហ៊ុនមិនទាន់បានដោះស្រាយនូវបញ្ហានានាដែលក្រសួងបរិស្ថានបានស្នើឡើង ក៏ដូចជាសំណូមពររបស់ប្រជាពលរដ្ឋទេ ដោយក្រុមហ៊ុនស្នើសុំពេលចំនួន ៣ខែដើម្បីរៀបចំស៊ីឡូស្តុកផេះធ្យូងថ្មចំនួនពីរចំណុះ ៤.០០០តោន និងស្វែងរកក្រុមហ៊ុនដៃគូសហការដើម្បីទទួលយកផេះពីរោងចក្រផលិតថាមពលអគ្គិសនីដើរដោយដុតធ្យូងថ្ម (ក្រុមហ៊ុន CEL និង CIIDG) ដោយផ្ទាល់ ដោយពុំចាំបាច់ដឹកចូលទីតាំងរបស់ខ្លួនបច្ចុប្បន្ន ហេីយបានស្នេីសុំបន្តធ្វេីការកែច្នៃផេះធ្យូងថ្ម ដែលនៅសល់ចំនួនប្រមាណ ២០.០០០តោន ក្នុងរយៈពេលប្រមាណ ២ឆ្នាំ ដោយមិនប្តូរទីតាំងថ្មីឡើយ ហើយបើក្រុមហ៊ុនអនុវត្តមិនបាន ក្រុមហ៊ុននឹងដកខ្លួនចេញ។
បន្ទាប់ពីបានផ្លាស់ប្តូរមតិយោបល់គ្នារួចមក តំណាងប្រជាពលរដ្ឋមិនយល់ព្រមតាមសំណើរបស់ក្រុមហ៊ុនទេ ហើយឯកឧត្តមប្រធានបានសម្រេចប្រមូលយកមតិយោបល់ និងសំណូមពររបស់ប្រជាពលរដ្ឋ ក៏ដូចជាសំណើរបស់ក្រុមហ៊ុន ទៅពិនិត្យពិភាក្សា និងឆ្លងយោបល់និងការសម្រេចរបស់ថ្នាក់ដឹកនាំក្រសួងបរិស្ថាន។
ព័ត៌មានបន្ថែម
