កិច្ចប្រជុំពិគ្រោះយោបល់ជាមួយវិស័យឯកជនលើសេចក្តីព្រាងប្រកាស ស្តីពីចំណាត់ថ្នាក់នៃការវាយតម្លៃហេតុប៉ះពាល់បរិស្ថាន សម្រាប់គម្រោងអភិវឌ្ឍន៍

នៅព្រឹកថ្ងៃអង្គារ ៦កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៦ ខែសីហា ឆ្នាំ២០១៩ នៅទីស្តីការក្រសួងបរិស្ថាន ឯកឧត្ដម សៅ សុភាព រដ្ឋលេខាធិការក្រសួងបរិស្ថាន បានដឹកនាំកិច្ចប្រជុំពិគ្រោះយោបល់ជាមួយវិស័យឯកជនលើសេចក្តីព្រាងប្រកាស ស្តីពីចំណាត់ថ្នាក់នៃការវាយតម្លៃហេតុប៉ះពាល់បរិស្ថាន សម្រាប់គម្រោងអភិវឌ្ឍន៍។ កិច្ចប្រជុំនេះមានគោលបំណងប្រមូលធាតុចូលបន្ថែមទៅលើសេចក្តីព្រាងប្រកាស នឹងដើម្បីសម្រួលការងារផ្តល់សេវាសាធារណៈរបស់ក្រសួងបរិស្ថានជូនដល់ម្ចាស់គម្រោងអភិវឌ្ឍន៍ឯកជននិងសាធារណៈ អោយកាន់តែមានភាពងាយស្រួល រហ័ស និងប្រកបដោយស្មារតីទទួលខុសត្រូវខ្ពស់ ព្រមទាំងផ្តល់ជំនឿទុកចិត្តលើការងារវាយតម្លៃហេតុប៉ះពាល់បរិស្ថានចំពោះក្រសួងបរិស្ថាន ក៏ដូចជារាជរដ្ឋាភិបាលពីសំណាក់ម្ចាស់គម្រោង។

កិច្ចប្រជុំពិគ្រោះយោបល់នេះមានការចូលរួមពី លោកអគ្គនាយករង នៃអគ្គនាយកដ្ឋានគាំពារបរិស្ថាន នាយកដ្ឋានវាយតម្លៃហេតុប៉ះពាល់បរិស្ថាន និងមន្រ្តីជំនាញ តំណាងសមាគមរោងចក្រកាត់ដេរ និងសមាជិកនៃសមាគមរោងចក្រកាត់ដេរ តំណាងក្រុមហ៊ុនពាក់ព័ន្ធនិងវិស័យរ៉ែ និងថាមពល តំណាងក្រុមហ៊ុនពាក់ព័ន្ធនិងវិស័យកសិកម្ម សំណង់ វិស័យទេសចរណ៍ និងហេដ្ឋារចនាសម័្ពន្ធ តំណាងក្រុមហ៊ុនទីប្រឹក្សា តំណាងម្ចាស់បូរីនៅភ្នំពេញ តំណាងម្ចាស់បូរីនៅខេត្តព្រះសីហនុ តំណាងអង្គការជាតិ អន្តរជាតិ និងធនាគារ សរុបប្រមាណ៩៤នាក់។