ឯកឧត្តម ស្រ៊ុន ដារិទ្ធិ ចូលរួមដាំកូនឈើ២០០០ដើម និងសម្ពោធកសិដ្ឋានចំការម៉ៃសាក់ នៅខេត្តកំពង់ស្ពឺ

ឯកឧត្តម ស្រ៊ុន ដារិទ្ធិ រដ្ឋលេខាធិការក្រសួងបរិស្ថាន នៅថ្ងៃច័ន្ទ ៤រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៩ ខែសីហាឆ្នាំ ២០១៩ បានអញ្ជើញចូលរួមដាំកូនឈើចំនួន២០០០ដើម ជាមួយប្រតិភូថ្នាក់ដឹកនាំ និងមន្រ្តីរាជការក្រសួងបរិស្ថាន តំណាងអាជ្ញាធរខេត្តកំពង់ស្ពឺ មន្រ្តីឧទ្យានុរក្ស ផ្នែកឯកជន និងប្រជាពលរដ្ឋ នៃសហគមន៍តំបន់ការពារធម្មជាតិតាសាល ក្នុងដែនជម្រកសត្វព្រៃភ្នំឱរ៉ាល់ ភូមិសាស្រ្តខេត្តកំពង់ស្ពឺ។ ជាមួយគ្នានេះ ឯកឧត្តមបានចូលរួមកាត់ខ្សែបូណ៌សម្ពោធដាក់ឱ្យដំណើរការកសិដ្ឋានចំការម៉ៃសាក់ ដែលសហគមន៍បានសហការជាមួយក្រុមហ៊ុន TEAK FARM ខេមបូឌា ដាំប្រភេទឈើលូតលាស់លឿននេះ នៅលើដីព្រៃរិចរិលចំនួន៣៥០ហិកតា របស់សហគមន៍ ដែលមានសរុបចំនួន៥៦៧ហិកតា រយៈពេល១៥ឆ្នាំ ស្របតាមច្បាប់ស្តីការគ្រប់គ្រងធម្មជាតិនៃព្រះរាជាណាចក្រកម្ពុជា។

ឯកឧត្តម ស្រ៊ុន ដារិទ្ធិ បានលើកឡើងថា ក្រសួងបរិស្ថានបានចាត់ទុកសហគមន៍ចូលរួមចំណែកសំខាន់ក្នុងការការពារ និងអភិរក្សធនធានធម្មជាតិ។ ក្រសួងបរិស្ថានលើកទឹកចិត្តដល់សហគមន៍ការពារធម្មជាតិតាមរយៈផ្តល់បច្ចេកទេស ពូជសត្វ ជាដើម។ ឯកឧត្តមបានចាត់ទុកថា កិច្ចសហការដាំព្រៃម៉ៃសាក់លើដីព្រៃរិចរិលរបស់សហគមន៍តំបន់ការពារធម្មជាតិតាសាល បានចូលរួមចំណែកសំខាន់ដល់កាត់បន្ថយការអាស្រ័យផលលើធនធានធម្មជាតិ ធ្វើការអភិវឌ្ឍន៍ហេដ្ឋារចនាសម្ព័ន្ធ ជាពិសេសទប់ស្កាត់ការទន្រ្ទានដីព្រៃ ហើយម្យ៉ាងទៀត ចំការព្រៃនេះនឹងអាចទាក់ទាញទេចរណ៍ធម្មជាតិ ដែលជួយបន្ថែមទៀតដល់ការលើកកម្ពស់ជីវភាពប្រជាសហគមន៍ថែមមួយកម្រិតទៀត។