កិច្ចប្រជុំគណៈកម្មាធិការប្រតិបត្តិលើកទី២៤ នៃក្រុមប្រឹក្សាអង្គការអន្តរជាតិភាពជាដៃគូក្នុងការគ្រប់គ្រងបរិស្ថានសមុទ្រនៅអាស៊ីបូព៌ា (PEMSEA) តាមប្រព័ន្ធវីដេអូ

នៅថ្ងៃទី២៣ ខែមេសា ឆ្នាំ២០២០ នៅទីស្តីការសួងបរិស្ថាន ឯកឧត្តម វ៉ាន់ មុនីនាថ អគ្គលេខាធិការរងក្រុមប្រឹក្សាជាតិអភិវឌ្ឍន៍ដោយចីរភាព និងជាសហប្រធានក្រុមប្រឹក្សាអង្គការ PEMSEA បានចូលរួមកិច្ចប្រជុំគណៈកម្មាធិការប្រតិបត្តិលើកទី២៤ តាមរយៈប្រព័ន្ធវីដេអូ ជាមួយសមាជិករបស់ខ្លួន ដើម្បីពិនិត្យលើកិច្ចការចាំបាច់មួយចំនួន។ ជាលទ្ធផល អង្គប្រជុំ បានឯកភាពលើ (១)របាយការណ៍ហិរញ្ញវត្ថុសវនកម្មឆ្នាំ២០១៩ (២)ផែនការ និងថវិកាឆ្នាំ២០២០-២០២១ និងស្នើសុំការអនុម័តក្នុងកិច្ចប្រជុំក្រុមប្រឹក្សាលើកទី១២ ខែកក្កដា (៣)ផ្តល់អនុសាសន៍ឱ្យអង្គការ PEMSEA ស្វែងរកប្រភពមូលនិធិពីស្ថាប័នអន្តរជាតិ ដើម្បីគាំទ្រដល់ការអនុវត្តផែនការសកម្មភាព និងរកជំនាញការរៀបចំយុទ្ធសាស្រ្តក្រោយជម្ងឺរាតត្បាត COVID-19 (៤)ចំពោះការរៀបចំមហាសន្និបាទសមុទ្រអាស៊ីបូព៌ាឆ្នាំ២០២១ នៅកម្ពុជា នឹងត្រូវប្រារព្វឡើងផ្អែកតាមការសម្រេចចិត្តរបស់រាជរដ្ឋាភិបាលកម្ពុជា ស្តីពីការដកចេញបំរាមជួបជុំ ពាក់ព័ន្ធនឹងជម្ងឺរាតត្បាត COVID-19 និងគណៈកម្មាធិការប្រតិបត្តិ បានផ្តល់អនុសាសន៍ទទួលយកវិទ្យាស្ថានស្រាវជ្រាវទឹកនៃប្រទេសន័រវែស និងវិទ្យាស្ថានគ្រប់គ្រងសមុទ្រ នៃសកលវិទ្យាល័យ Xiamen ប្រទេសចិន ជាដៃគូអង្គការ PEMSEA និងសម្រេចស្នើសុំការអនុម័តពីកិច្ចប្រជុំក្រុមប្រឹក្សា។