ឯកឧត្តម សាយ សំអាល់ ដឹកនាំកិច្ចប្រជុំពង្រឹងផែនការគ្រប់គ្រងបរិស្ថាន ដើម្បីការអភិវឌ្ឍដោយចីរភាព

ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន នៅថ្ងៃចន្ទ ២កើត ខែអាសាធ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២២ ខែមិថុនា ឆ្នាំ២០២០ នាទីស្តីការក្រសួងបរិស្ថាន បានដឹកនាំប្រជុំស្តីពីការរៀបចំផែនការពង្រឹងការងារគ្រប់គ្រងបរិស្ថាននៅកម្ពុជាឱ្យមានប្រសិទ្ធភាព ដើម្បីការអភិវឌ្ឍដោយចីរភាព។

ក្នុងឱកាសនោះ ឯកឧត្តមរដ្ឋមន្រ្តី បានគាំទ្រគំនិតផ្តួចផ្តើមក្នុងការសិក្សាស្រាវជ្រាវ ដែលមានលក្ខណៈ វិទ្យាសាស្រ្ត និងសេដ្ឋកិច្ច ដោយផ្អែកលើភាពជាក់ស្តែង សំដៅគាំទ្រដល់កម្មវិធីការងារគោលនយោបាយ និងដំណើរការសម្រេចចិត្តក្នុងការងារគ្រប់គ្រងបរិស្ថាន ដើម្បីការអភិវឌ្ឍដោយចីរភាពនៅកម្ពុជា។