ក្រសួងបរិស្ថាននាំយកធុងចម្រោះទឹកស្អាត ប្រគេនវត្តភ្នៀតសិម្ពលី
ថ្ងៃ សៅរ៍, 25 កក្កដា, 2020នាព្រឹកថ្ងៃសៅរ៍ ទី២៥ ខែកក្កដា ឆ្នាំ២០២០ ឯកឧត្តមជួប ប៉ារីស៍ អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថាន បានដឹកនាំថ្នាក់ដឹកនាំ និងមន្រ្តីចំណុះអគ្គនាយកដ្ឋានចំណេះដឹងនិងព័ត៌មានបរិស្ថាន នាំយកធុងចម្រោះទឹកស្អាតមួយគ្រឿង និងទ័យវត្ថុមួយចំនួន ប្រគេនដល់ព្រះចៅអធិការវត្តភ្នៀតសិម្ពលី ដែលមានទីតាំងក្នុងសង្កាត់ស្នោរ ខណ្ឌកំបូល រាជធានីភ្នំពេញ។
នៅក្នុងឱកាសនោះ ព្រះសិរីកោសល សុំ សុខា ព្រះវិន័យធរគណ រាជធានីភ្នំពេញ ព្រះគ្រូអនុគណខណ្ឌកំបូល និងជាព្រះចៅអធិការ វត្តភ្នៀតសិម្ពលី បានមានសង្ឃដីកាថា ធុងចម្រោះទឹកស្អាតនេះមានសារប្រយោជន៍ច្រេីនគឺ (១) ជួយដល់ព្រះសង្ឃ និងដូនជីតាជី នៅក្នុងវត្តបានទទួលទឹកស្អាតសុវត្ថិភាពសម្រាប់ឆាន់និងបរិភោគ (២) ជួយកាត់បន្ថយការចំណាយទិញទឹកសុទ្ធនៅក្នុងវត្ត និង(៣) គឺចូលរួមកាត់បន្ថយការប្រេីប្រាស់ដបប្លាស្ទិក ដែលជាការជួយដល់បរិស្ថាននៅក្នុងវត្តមានភាពល្អប្រសេីរឡេីង។ ឆ្លៀតក្នុងឱកាសនោះដែរ ព្រះអង្គបានមានសង្ឃដីកា ថ្លែងអំណរគុណដល់ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន តាមរយ:មូលនិធិបរិស្ថាននិងសង្គម បានផ្តល់ធុងចម្រោះទឹកស្អាតនេះដល់វត្តភ្នៀតសិម្ពលី ប្រេីប្រាស់ នេះជាការចិត្តទុកដាក់ចំពោះវិស័យពុទ្ធចក្រ នៅព្រះរាណាចក្រកម្ពុជា។
ព័ត៌មានបន្ថែម
