ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានបានទទួលជួបពិភាក្សាការងារជាមួយក្រុមអ្នកស្ម័គ្រចិត្តក្រៀលកម្ពុជាដែលធ្វើការងារលើការសម្អាតអនាម័យបរិស្ថានដើម្បីផ្តល់យោបល់និងបង្កើនកិច្ចសហការអនុវត្តគម្រោង«រក្សាបរិស្ថានស្អាត»

នៅរសៀលថ្ងៃទី៨ ខែមករានេះ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានបានទទួលជួបពិភាក្សាការងារជាមួយក្រុមអ្នកស្ម័គ្រចិត្តក្រៀលកម្ពុជាដែលធ្វើការងារលើការសម្អាតអនាម័យបរិស្ថានដើម្បីផ្តល់យោបល់និងបង្កើនកិច្ចសហការអនុវត្តគម្រោង«រក្សាបរិស្ថានស្អាត»។ គម្រោងនេះ នឹងអនុវត្តនៅរាជធានីភ្នំពេញ ខេត្តបាត់ដំបង សៀមរាប កែប និងកំពត។ គម្រោងក្រៀលកម្ពុជាមានអ្នកស្ម័គ្រចិត្តប្រមាណ ៥០០០នាក់ជាយុវជន សិស្សនិស្សិត ព្រះសង្ឃចូលរួមធ្វើសកម្មភាពសម្អាតអនាម័យបរិស្ថាន។ គម្រោងនេះមានគោលដៅចូលរួមជំរុញឱ្យប្រជាពលរដ្ឋទុកដាក់សំរាមជាពិសេសគ្រប់គ្រងសំណល់ប្លាស្ទិកឱ្យបានត្រឹមត្រូវ និងបណ្តុះស្មារតីឱ្យស្រឡាញ់បរិស្ថាន។ ក្រសួងបរិស្ថានបានគាំទ្រគម្រោង «រក្សាបរិស្ថានស្អាត» នេះដែលគ្រោងនឹងធ្វើយុទ្ធនាការសម្អាតអនាម័យបរិស្ថាននៅតាមដងផ្លូវនានាចាប់ពីខែកុម្ភៈតទៅដោយសហការជាមួយក្រសួងស្ថាប័នពាក់ព័ន្ធនានា។