កិច្ចប្រជុំពិភាក្សាតាមប្រព័ន្ធហ្សូមជាមួយក្រុមការងារក្រសួងប្រៃសណីយ៍ និងទូរគមនាគមន៍

នៅព្រឹកថ្ងៃទី១៩ ខែឧសភា ឆ្នាំ២០២១ នេះ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន និងជាសមាជិកក្រុមការងារអន្តរក្រសួងបានដឹកនាំក្រុមការងារក្រសួងបរិស្ថានជួបប្រជុំពិភាក្សាតាមប្រព័ន្ធហ្សូមជាមួយក្រុមការងារក្រសួងប្រៃសណីយ៍ និងទូរគមនាគមន៍ដឹកនាំដោយឯកឧត្តម ជុន វ៉ាត រដ្ឋលេខាធិការដើម្បីផ្តល់ធាតុចូលបន្ថែមលើសេចក្តីព្រាងគោលនយោបាយរដ្ឋាភិបាលឌីជីថលកម្ពុជា ២០២១-២០៣០។ គោលនយោបាយរដ្ឋាភិបាល ឌីជីថលនេះរៀបចំឡើងក្នុងគោលបំណង លើកកម្ពស់គុណភាពជីវិតនិងទំនុកចិត្តប្រជាពលរដ្ឋតាមរយៈការបម្រើសេវាសាធារណៈកាន់តែប្រសើរ ដោយបានដាក់ចេញនូវវិធានការគោលនយោបាយអាទិភាពក្រមក្របខណ្ឌយុទ្ធឋាស្ត្រចំនួន ៥ គឺ ១)បទដ្ឋានគតិយុត្តរដ្ឋាភិបាលឌីជីថល ២)ហេដ្ឋារចនាសម្ព័ន្ធឌីជីថល ៣)សេវារដ្ឋាភិបាលឌីជីថល ៤)ការកសាងសមត្ថភាព កាតស្រាវជ្រាវ និងនវានុវត្តន៍ឌីជីថល និង ៥)ភាពជាដៃគូរវាងរដ្ឋនិងឯកជន។