ការចុះពិនិត្យ និងពង្រឹងការងារគ្រប់គ្រងធនធានធម្មជាតិ និងអភិរក្ស ជីវៈចម្រុះនៅដែនជម្រកសត្វព្រៃភ្នំសំកុស ឧទ្យានជាតិជួរភ្នំក្រវ៉ាញកណ្តាល និងរបៀងអភិរក្សជីវៈចម្រុះ

គណៈប្រតិភូក្រសួងបរិស្ថានដឹកនាំដោយឯកឧត្តមរដ្ឋលេខាធិការ ស្រ៊ុន ដារិទ្ធ និងឯកឧត្តមរដ្ឋលេខាធិការ នេត្រ ភក្ត្រា ដោយមានការចូលរួមពីឯកឧត្តម ខូយ រីដា អភិបាលរងនៃគណៈអភិបាលខេត្តពោធិ៍សាត់ និងមន្ត្រីជំនាញ បានចុះបំពេញបេសកកម្មរយៈពេល ២ ថ្ងៃពីថ្ងៃទី១១-១២ ខែវិច្ឆិកា ឆ្នាំ២០២១ នៅក្នុងភូមិសាស្ត្រស្រុកវាលវែង ខេត្តពោធិ៍សាត់ដើម្បីពិនិត្យ និងពង្រឹងការងារគ្រប់គ្រងធនធានធម្មជាតិ និងអភិរក្សជីវៈចម្រុះនៅដែនជម្រកសត្វព្រៃភ្នំសំកុស ឧទ្យានជាតិជួរភ្នំក្រវ៉ាញកណ្តាល និងរបៀងអភិរក្សជីវៈចម្រុះ។ គណៈប្រតិភូបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីឧទ្យានុរក្ស និងជាពិសេសកិច្ចខិតខំប្រឹងប្រែងរបស់គណៈបញ្ជាការឯកភាពនៃរដ្ឋបាលខេត្តពោធិ៍សាត់ដែលបានដើរតួនាទីយ៉ាងសំខាន់ក្នុងការសម្រួលកម្លាំងសមត្ថកិច្ចពាក់ព័ន្ធចូលរួមថែរក្សា ការពារ អភិរក្សធនធានធម្មជាតិនៅក្នុងខេត្ត និងបានចាត់វិធានការហ្មត់ចត់ក្នុងការទប់ស្កាត់ បង្ក្រាប និងលុបបំបាត់បទល្មើសធនធានធម្មជាតិគ្រប់ប្រភេទ។