វគ្គបណ្តុះបណ្តាលមន្ត្រីឧទ្យានុរក្សស្តីពីវិធីសាស្ត្រល្បាតក្នុងតំបន់ការពារធម្មជាតិ បានបិទបញ្ចប់ដោយជោគជ័យ

សិក្ខាកាមជាឧទ្យានុរក្សដែលបានបញ្ចប់វគ្គបណ្តុះបណ្តាលនាពេលនេះ មានចំនួន២៥នាក់ មកពីតាមបណ្តារាជធានី-ខេត្ត ចំនួន២០។ វគ្គបណ្តុះបណ្តាលនេះប្រព្រឹត្តទៅមានរយៈពេល៥៤ថ្ងៃ គឺចាប់ពីថ្ងៃទី០១ ខែវិច្ឆិកា ដល់ថ្ងៃទី២៣ ខែធ្នូ ឆ្នាំ២០២១) ដោយសិក្ខាកាមទាំងអស់នឹងសិក្សាទៅលើមុខវិជ្ជាចំនួនពីរ រួមមាន៖ ទី១)ការអប់រំៈ អប់រំនាយ បទបញ្ជា និងលំហាត់របៀប និងទី២)វិទ្យាសាស្ត្រយោធាៈ យុទ្ធវិធី ឋានលេខា សព្វាវុធ បច្ចេកទេសបាញ់ កាយសិក្សាយោធា និងកីឡា។

ក្នុងរយៈពេលនៃការហ្វឹកហាត់៥៤ថ្ងៃកន្លងមក សិក្ខាកាមទាំងអស់ បានយល់ដឹងអំពីទ្រឹស្តីរួមអំពីការប្រើប្រាស់អាវុធCKC និងអនុវត្តការដោះរៀបអាវុធ យល់ដឹងផ្នែកយុទ្ធសាស្ត្រទ័ពថ្មើរជើងកម្រិតពួក-ក្រុម ចេះដឹកនាំបញ្ជា និងយល់បានអំពីនីតិវិធីរបៀបរបបបោះជំរំតាមបែបយោធា ដែលមានការបោះជំរំយុទ្ធវិធី ដើម្បីត្រៀមលក្ខណៈឆ្លើយតបទៅតាមសភាពការណ៍ ដែលកើតឡើងជាយថាហេតុ នៅក្នុងតំបន់បោះជំរំ។