កិច្ចប្រជុំផ្សព្វផ្សាយលទ្ធផលកិច្ចប្រជុំសន្និសីទកំពូលបណ្ដាភាគីអនុសញ្ញាសហប្រជាជាតិស្ដីពីការប្រែប្រួលអាកាសធាតុលើកទី២៦ (COP26)

ថ្ងៃទី២៦ ខែមករា ឆ្នាំ២០២២

ក្រសួងបរិស្ថាន បានរៀបចំកិច្ចប្រជុំផ្សព្វផ្សាយលទ្ធផលកិច្ចប្រជុំសន្និសីទកំពូលបណ្ដាភាគីអនុសញ្ញាសហប្រជាជាតិស្ដីពីការប្រែប្រួលអាកាសធាតុលើកទី២៦ (COP26) ក្រោមអធិបតីភាព ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដោយមានការចូលរួមពីក្រសួងស្ថាប័នពាក់ព័ន្ធថ្នាក់ជាតិ និងថ្នាក់ក្រោមជាតិ និងស្ថាប័នស្រាវជ្រាវ។ គោលបំណងសំខាន់ នៃកិច្ចប្រជុំគឺដេីម្បីផ្សព្វផ្សាយលទ្ធផលសំខាន់ៗនៃកិច្ចប្រជុំ COP26 ដែលរៀបចំឡើងនៅចក្រភពអង់គ្លេស កាលពីថ្ងៃទី៣១ ខែតុលា ដល់ថ្ងៃទី១២ ខែវិច្ឆិកា ឆ្នាំ២០២១ ក្នុងនោះ

ឯកឧត្តមរដ្ឋមន្ត្រីបានបានគូសបញ្ជាក់ចំណុចសំខាន់ៗចំនួន៥ចំណុចរួមមាន៖ ១)យន្តការនៃការលក់កាបូនៈ បច្ចុប្បន្នកម្ពុជាបានជោគជ័យក្នុងការលក់ឥណទានកាបូនព្រៃឈេីពីគម្រោងREDD+ ហេីយថវិការដែលទទួលបាននឹងប្រេីប្រាប់ដេីម្បីការការពារព្រៃឈេី លេីកកម្ពស់កម្រឹតជីវភាព និងសុខមាលភាពប្រជាជននៅមូលដ្ឋាន។ ក្រសួងបរិស្ថានក៏កំពុងរៀបចំនិតិវិធីដេីម្បីផ្តល់ហិរញ្ញប្បន្នទានដែលបានមកពីការលក់កាបូននេះជូនដល់ថ្នាក់ក្រោមជាតិដែលជាអ្នកអនុវត្តផ្ទាល់នាពេលខាងមុខ ២)លេីកទឹកចិត្តឱ្យថ្នាក់ក្រោមជាតិឱ្យចូលរួមក្នុងកិច្ចប្រជុំCoPនៅពេលខាងមុខ ដែលជាឱកាសក្នុងការកៀរគរធនធានហិរញ្ញប្បទានអាកាសធាតុ ដេីម្បីអភិវឌ្ឍន៍នៅមូលដ្ឋាន និងពិនិត្យមេីលលេីឱកាសក្នុងកិច្ចសហប្រតិបត្តិការទ្វេភាគី ពីសំណាកបណ្តាប្រទេសនានាផងដែរ ដោយបច្ចុប្បន្នកម្ពុជាអាចមានលទ្ធភាពច្រើនក្នុងការទាញយកហិរញ្ញប្បទានចេញពីមូលនិធិប្រែប្រួលអាកាសធាតុ តាមរយៈគម្រោងតូចៗនៅថ្នាក់ក្រោមជាតិ ដែលមានការឆ្លើយតបនឹងការប្រែប្រួលអាកាសធាតុ។ ក្រសួងបរិស្ថាន លើកទឹកចិត្ត និងត្រៀមខ្លួនសហការសម្របសម្រួលជាមួយរដ្ឋបាលស្រុក ខេត្ត ក្នុងការរៀបចំស្នើសុំប្រើប្រាស់កញ្ចប់មូលនិធីនេះ ដើម្បីការអភិរក្សធនធានធម្មជាតិ និងការអភិវឌ្ឍនៅមូលដ្ឋាន ៣)ធនាគារៈ យេីងអាចទាញយកឱកាសក្នុងការទាញយកប្រភពហិរញ្ញប្បទានដែលមានការប្រាក់ទាប ដោយផ្សារភ្ជាប់នឹងបរិស្ថាននិងការអភិវឌ្ឍន៍បៃតង ៤) ការប្រែប្រួលអាកាសធាតុបានក្លាយទៅជាបញ្ហានយោបាយនិង សេដ្ឋកិច្ច ដូច្នេះយេីងគួរពង្រឹងការផ្សព្វផ្សាយទាំងថ្នាក់ជាតិ និងអន្តរជាតិអំពីការខិតខំប្រឹងប្រែងរបស់កម្ពុជាក្នុងការចូលរួមឆ្លេីយតបនឹងការប្រែប្រួលអាកាសធាតុ និងបញ្ហាបរិស្ថាន ៥)ការដាក់បញ្ជូលឬបន្ស៊ីលទ្ធផលកិច្ចប្រជុំសំខាន់ទៅក្នុងគោលនយោបាយ ផែនការយុទ្ធសាស្រ្តរបស់ជាតិ។