លោកជំទាវ ឌិត នីតា ភរិយាឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតីក្នុងពិធីប្រារព្វខួបលើកទី៧៣ ទិវាកុមារអន្តរជាតិ ១មិថុនា ខួបលើកទី២១ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជា ឆ្នាំ២០២២ នៅសាលាមត្តេយ្យក្រុង ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ នៅថ្ងៃទី០១ ខែមិថុនា ឆ្នាំ២០២២

ព្រះសីហនុ ៖ លោកជំទាវ ឌិត នីតា ភរិយាឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតីក្នុងពិធីប្រារព្វខួបលើកទី៧៣ ទិវាកុមារអន្តរជាតិ ១មិថុនា ខួបលើកទី២១ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជា ឆ្នាំ២០២២ នៅសាលាមត្តេយ្យក្រុង ស្ថិតនៅសង្កាត់លេខ៣ ក្រុងព្រះសីហនុ ខេត្តព្រះសីហនុ នៅថ្ងៃទី០១ ខែមិថុនា ឆ្នាំ២០២២ ដោយមានការអញ្ជើញចូលរួមពីថ្នាក់ដឹកនាំក្រសួងបរិស្ថាន មន្ទីស្ថាប័នពាក់ព័ន្ធជុំវិញខេត្ត លោកគ្រូអ្នកគ្រូ ឪពុកម្តាយ អាណាព្យាបាល និងសិស្សានុសិស្សយ៉ាងច្រើនកុះករ។

ក្នុងឱកាសនោះដែរ លោកជំទាវ ឌិត នីតា បានសម្តែងនូវសេចក្តីសប្បាយរីករាយត្រេកអរ ដែលបានមកជួបក្មួយៗជាថ្មីម្តងទៀតនៅទីនេះ។ ជាមួយគ្នានេះ លោកជំទាវក៏បានថ្លែងអំណរគុណយ៉ាងជ្រាលជ្រៅដល់លោកគ្រូអ្នកគ្រូ អាណាព្យាលបាល ជាពិសេសក្រុមការងារ ដែលបានជួយក្នុងការរៀបចំហេដ្ឋារចនាសម្ព័ន្ធនៅក្នុងសាលាមត្តេយ្យនេះ ឱ្យមានកម្រិតស្តង់ដារសាលាមេត្រីបរិស្ថាន ដោយកុមារា កុមារីទាំងអស់គ្នា បានរៀនសូត្រដូចសាលានៅក្នុងទីក្រុងដែរ។ លោកជំទាវ បានបញ្ជាក់ឱ្យដឹងថា យើងអាចបើកដំណើរការសាលារៀន ក៏ដូចជាប្រទេសឡើងវិញបាន ក៏ព្រោះតែការដាក់ចេញដ៏ត្រឹមត្រូវនូវគោលនយោបាយស្រោចវ៉ាក់សាំងរបស់ប្រមុខរាជរដ្ឋាភិបាល។

យោងតាមការបញ្ជាក់ពីលោកស្រី គល់ សុភាព នាយិកាសាលាមត្តេយ្យក្រុងព្រះសីហនុ បានឱ្យដឹងថា បច្ចុប្បន្នសាលាមានអគារសិក្សាចំនួន៣ខ្នង ស្មើនឹង៧បន្ទប់ សិស្សសរុបចំនួន២៨៨នាក់ ស្រី១៤១នាក់ មានថ្នាក់រៀនចំនួន៦ថ្នាក់ (កម្រិតទាបចំនួន១ថ្នាក់ មានសិស្សចំនួន៦០នាក់ ស្រី៣០នាក់ កម្រិតបឋមចំនួន១ថ្នាក់ មានសិស្សចំនួន៣៧នាក់ ស្រី១៤នាក់ និងកម្រិតខ្ពស់ចំនួន៤ថ្នាក់ មានសិស្សចំនួន១៩២នាក់ ស្រី៩៨នាក់) មានគ្រូបង្រៀនសរុបចំនួន១១នាក់ ស្រី១១នាក់ និងនាយិកា១នាក់ ។