ឯកឧត្តម ផៃ ប៊ុនឈឿន ផ្សព្វផ្សាយអំពីដំណើរការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថាន

ឯកឧត្តម ផៃ ប៊ុនឈឿន រដ្ឋលេខាធិការប្រចាំការ ក្រសួងបរិស្ថាន នាព្រឹកថ្ងៃទី១៤ ខែមិថុនា ឆ្នាំ២០២២ នៅមន្ទីរបរិស្ថានខេត្តកំពង់ឆ្នាំង បានធ្វើការផ្សព្វផ្សាយអំពីដំណើរការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថាន។ វេទិកានេះបានរៀបចំឡើងក្នុងគោលបំណងលើកទឹកចិត្តដល់គ្រប់អង្គភាព មន្ទីរបរិស្ថាន តំបន់ការពារធម្មជាតិ និងសហគមន៍តំបន់ការពារធម្មជាតិ អំពីដំណើរការ និងនីតិវិធីនៃការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថាន និងផែនការសកម្មភាព និងក្របខណ្ឌពេលវេលាសម្រាប់អនុវត្តដំណើរការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថានឆ្នាំ២០២២ និងណែនាំអំពីរបៀបបំពេញឯកសារ និងលក្ខខណ្ឌតម្រូវដើម្បីបំពេញឯកសារដាក់ពាក្យ និងចូលរួមក្នុងការវាយតម្លៃអង្គភាពគំរូឆ្នាំ២០២២ ពីថ្ងៃទី១ ដល់ថ្ងៃទី២៩ ខែកក្កដា ឆ្នាំ២០២២ ។ ក្នុងឱកាសនោះដែរ ឯកឧត្តម បានណែនាំដល់មន្ទីរអំពី ការអនុវត្តការងាររវាងរដ្ឋបាលថ្នាក់ជាតិ និងថ្នាក់ក្រោមជាតិ ការអនុវត្តរដ្ឋបាលទំនើប ការគ្រប់គ្រងសំណល់រឹងទីប្រជុំជន ការអភិរក្សជីវចម្រុះក្នុងខេត្ត ការរស់នៅដោយចីរភាព ការគាំទ្រដល់សហគមន៍តំបន់ការពារធម្មជាតិ និងការរក្សាសាមគ្គីភាពផ្ទៃក្នុងរបស់អង្គភាព។