លោកជំទាវ ម៉ុម ថានី អញ្ជើញជាអធិបតីបើកកិច្ចប្រជុំបណ្តាញស្រ្តីសហគមន៍តំបន់ការពារធម្មជាតិ

ថ្លែងទៅកាន់អង្គពិធី លោកជំទាវបានប្រសាសន៍លើកឡើងថា កិច្ចប្រជុំនេះពិតជាមានសារៈសំខាន់ មិនមែនសម្រាប់តែបណ្តាញស្រ្តីសហគមន៍តំបន់ការពារធម្មជាតិប៉ុណ្ណោះទេ តែសម្រាប់ក្រុមការងារបច្ចេកទេសយេនឌ័រក្រសួងបរិស្ថាន និងក្រុមការងារអង្គការរីខូហ្វ ក្នុងការឆ្លុះបញ្ចាំងពីវឌ្ឍនភាពរបស់បណ្តាញស្រ្តីដែលបានបង្កើតចាប់តាំងពីឆ្នាំ២០១៩ រហូតមកដល់បច្ចុប្បន្ន ក៏ដូចជាប្រើប្រាស់ឱកាសនេះក្នុងការពង្រឹង និងអភិវឌ្ឍន៍សមត្ថភាពស្រ្តីក្នុងសហគមន៍តំបន់ការពារធម្មជាតិបន្ថែមទៀត ស្របតាមផែនការយុទ្ធសាស្រ្ត បញ្រ្ជាបយេនឌ័រក្នុងវិស័យបរិស្ថាន ២០២១-២០២៥ របស់ក្រសួងបរិស្ថាន និងផែនការយុទ្ធសាស្រ្តរបស់អង្គការរីខូហ្វ ២០១៨-២០២៥ ផងដែរ។ ជាមួយគ្នានេះ លោកជំទាវបានលើកយកនូវចំណុចសំខាន់៣ ចែករំលែកដល់ក្រុមការងារ និងអ្នកចូលរួមទាំងអស់ រួមមាន៖ ១)ការចូលរួមរបស់ស្រ្តីក្នុងការគ្រប់គ្រងតំបន់ការពារធម្មជាតិជាការចូលរួមមិនអាចខ្វះបាន ២) ការគិតគូរ និងវិនិយោគលើការអភិវឌ្ឍសមត្ថភាពរបស់ស្រ្តីក្នុងការគ្រប់គ្រងសហគមន៍តំបន់ការពារធម្មជាតិជាវិនិយោគវ័យឆ្លាត និង៣)និរន្តភាពនៃសហគមន៍តំបន់ការពារធម្មជាតិទាមទារឱ្យមានការចូលរួមគាំទ្រគ្រប់អ្នកពាក់ព័ន្ធ និងចាំបាច់ត្រូវការស្រ្តីខ្លាំង។