វេទិកាអ្នកពាក់ព័ន្ធថ្នាក់តំបន់លើកទី១២ របស់គណៈកម្មការទន្លេមេគង្គ (MRC RSF#12) ស្តីពីដោះស្រាយបញ្ហាប្រឈមពីការអភិវឌ្ឍ និងការប្រែប្រួលអាកាសធាតុ ក្នុងអាងទន្លេមេគង្គ នៅទីក្រងបាងកក ប្រទេសថៃ

បាងកក៖ នៅថ្ងៃទី២៩ ខែមិថុនា ឆ្នាំ២០២២

ឯកឧត្តម ហេង ចាន់ធឿន អគ្គនាយករង នៃ អគ្គនាយកដ្ឋានគោលនយោបាយ និងយុទ្ធសាស្រ្តនៃក្រសួងបរិស្ថាន បានចូលរួមវេទិកាអ្នកពាក់ព័ន្ធថ្នាក់តំបន់លើកទី១២ របស់គណៈកម្មការទន្លេមេគង្គ (MRC RSF#12) ស្តីពីដោះស្រាយបញ្ហាប្រឈមពីការអភិវឌ្ឍ និងការប្រែប្រួលអាកាសធាតុ ក្នុងអាងទន្លេមេគង្គ នៅទីក្រងបាងកក ប្រទេសថៃ។ ប្រតិភូប្រទេសកម្ពុជា ដែលក្នុងនោះ ឯកឧត្តម គល់ វឌ្ឍនា អគ្គលេខាធិការរង គណៈកម្មាធិការជាតិទន្លេមេគង្គកម្ពុជា (គ.ជ.ទ.ម.ក.) បានដឹកនាំប្រតិភូកម្ពុជា សរុប ១១រូប ពីអន្តរក្រសួង រួមមាន៖ ក្រសួងបរិស្ថាន ក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ ក្រសួងរ៉ែ និងថាមពល និងអគ្គលេខាធិការដ្ឋាន គ.ជ.ទ.ម.ក. វេទិកាបានប្រព្រឹត្តទៅក្រោមអធិបតីភាព លោក Saravuth Cheavaprasert អគ្គលេខាធិការរង ការិយាល័យធនធានធម្មជាតិ និងទឹក (ONWR) នៃប្រទេសថៃ និង លោកបណ្ឌិត Anoulak Kittikhoun នាយកប្រតិបត្តិ នៃលេខាធិការដ្ឋាន MRC និងដោយមានការចូលរួមពីប្រតិភូតំណាងប្រទេសជាសមាជិក អង្គការមិនមែនរដ្ឋាភិបាល សង្គមស៊ីវិល វិទ្យាស្ថានសិក្សាស្រាវជ្រាវ ដៃគូអភិវឌ្ឍន៍ និងក្រុមការងារលេខាធិការដ្ឋាន MRC សរុប២៥០រូប។ គោលបំណងនៃវេទិកាគឺដើម្បី៖ (១) ផ្តល់ជាវេទិកាសម្រាប់គណៈកម្មការទន្លេមេគង្គក្នុងការចាប់ផ្តើមការងារសិក្សារួមគ្នា ដែលបានឯកភាពគ្នារវាងគណៈកម្មការទន្លេមេគង្គ និងភាគីចិន (២) ពិភាក្សាអំពីវិធីនៃការចែករំលែកព័ត៌មាន និងសម្របសម្រួលការងារប្រតិបត្តិការទំនប់បណ្តាក់លើដងទន្លេ និង (៣) ប្រមូលមតិយោបល់ និងអនុសាសន៍ពីអ្នកពាក់ព័ន្ធចម្រុះ ដើម្បីលើកកម្ពស់ការគ្រប់គ្រងជលផលឆ្លងដែន និងការផ្តល់សេវាកម្មសម្រាប់ការគ្រប់គ្រងទឹកជំនន់ និងភាពរាំងស្ងួតក្នុងបរិបទមានការអភិវឌ្ឍលឿន និងការប្រែប្រួលអាកាសធាតុ។