ក្រសួងបរិស្ថាន ៖ កិច្ចប្រជុំក្រុមការងារបច្ចេកទេសលើកទី៤ ការប្រើប្រាស់និងផលិតកម្មដោយនិរន្តរភាព
ថ្ងៃ ព្រហស្បតិ៍, 7 កក្កដា, 2022នៅថ្ងៃពុធ ០៨កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៦ ខែកក្កដា ឆ្នាំ២០២២ នាយកដ្ឋានសេដ្ឋកិច្ចបៃតងនៃអគ្គនាយកដ្ឋានគោលនយោបាយ និងយុទ្ធសាស្ត្រ សហការជាមួយគម្រោងទប់ស្កាត់សំណល់ប្លាស្ទិកសមុទ្រកម្ពុជា បានរៀបចំកិច្ចប្រជុំលើកទី៤ នៅសណ្ឋាគារសូហ្វីតែលភូគីត្រា រាជធានីភ្នំពេញ ក្រោមអធិបតីភាព លោកជំទាវ ងិន លីណា អគ្គនាយករងនៃអគ្គនាយកដ្ឋានគោលនយោបាយ និងយុទ្ធសាស្ត្រ និងជាប្រធានក្រុមការងារបច្ចេកទេស និងមានការចូលរួមពីសមាជិកក្រុមការងារបច្ចេកទេស និងដៃគូអភិវឌ្ឍន៍ សរុបចំនួន ៣៧រូប។ គោលបំណងនៃកិច្ចប្រជុំនេះ គឺដើម្បី៖ (១) បង្ហាញពីសេចក្តីសម្រេចក្រុមការងារបច្ចេកទេស SCP ដែលទើបបានកែសម្រួល និងបន្ថែមសមាជិកថ្មី (២) បង្ហាញពីបច្ចុប្បន្នភាពនៃដំណើរការ SCP ក្នុងប្រទេសកម្ពុជា និង (៣) បង្ហាញពីលទ្ធផលដែលទទួលបានក្រោមការអនុវត្តគោលដៅអភិវឌ្ឍប្រកបដោយចីរភាពកម្ពុជា លើការគ្រប់គ្រងសំណល់ដោយនិរន្តរភាពតាមរយៈវិធានការការពារ ការកាត់បន្ថយ ការកែច្នៃ និងការប្រើប្រាស់ឡើងវិញ។
កិច្ចប្រជុំ ទទួលបានលទ្ធផលដូចខាងក្រោម៖
– គ្រប់ស្ថាប័នពាក់ព័ន្ធបន្តពង្រឹងកិច្ចសហប្រតិបតិ្តការ និងចែករំលែកនូវព័តម៌ានដែលស្ថាប័ននីមួយៗបានកំពុងអនុវត្តន៍
– បន្តជំរុញ និងលើកទឹកចិត្តដល់វិស័យឯកជនដែលបានចូលរួមក្នុងការកែច្នៃសំណល់ ជាពិសេសសំណល់ប្លាស្ទិកដែលជាយន្តការមួយក្នុងការគាំទ្រសេដ្ឋកិច្ចវិលជុំនៅកម្ពុជា
– សមាជិកក្រុមការងារបច្ចេកទេសដូចមានក្នុងសេចក្តីសម្រេចថ្មី ត្រូវតែចូលរួមនិងមានវត្តមាននូវរាល់កិច្ចប្រជុំ ដោយមិនមានអ្នកជំនួស (លើកលែងតែមានករណីពិសេស ឬបន្ទាន់ណាមួយពីថ្នាក់ដឹកនាំរបស់ស្ថាប័នរបស់ខ្លួន) ដើម្បីតាមដានឱ្យទាន់នូវយន្តការ និងការអនុវត្ត SCP នៅកម្ពុជា។
