ពិធីប្រកាសបើកគម្រោង«លើកកម្ពស់សេដ្ឋកិច្ចមូលដ្ឋានតាមរយៈការអនុវត្តកសិរុក្ខកម្ម និងក្សេតបរិស្ថាន»ជាផ្លូវការនៅស្រុកក្រវាញ ខេត្តពោធិ៍សាត់

នៅព្រឹក ថ្ងៃសុក្រ ទី២៧ ខែមករា ឆ្នាំ២០២៣ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងជាប្រធានក្រុមការងារគ្រប់គ្រងគម្រោង បានអញ្ជើញជាអធិបតីភាពក្នុងពិធីប្រកាសបើកគម្រោង«លើកកម្ពស់សេដ្ឋកិច្ចមូលដ្ឋានតាមរយៈការអនុវត្តកសិរុក្ខកម្ម និងក្សេតបរិស្ថាន» ជាផ្លូវការនៅស្រុកក្រវាញ ខេត្តពោធិ៍សាត់ ដោយមានការចូលរួមពីលោកជំទាវ ប៉ុក ណាឌីអភិបាលរងនៃគណអភិបាលខេត្តពោធិ៍សាត់ ថ្នាក់ដឹកនាំនិងមន្រ្តីជំនាញនៃអគ្គនាយកដ្ឋានសហគមន៍មូលដ្ឋាន ទីប្រឹក្សាអមក្រសួងបរិស្ថាន មន្ទីរបរិស្ថានខេត្តពោធិ៍សាត់ មន្រ្តីឧទ្យានុរក្ស អាជ្ញាធរដែនដី គណៈកម្មការ និងសមាជិកសហគមន៍តំបន់ការពារធម្មជាតិរាំងខ្វាវ សរុបចំនួន៦៥នាក់។

តាមរយៈគម្រោងនេះ ប្រជាសហគមន៍តំបន់ការពារធម្មជាតិរាំងខ្វាវ មានសេចក្ដីសប្បាយរីករាយ និងមានក្ដីសង្ឃឹមយ៉ាងខ្លាំង ព្រមទាំងបានថ្លែងអំណរគុណជូនចំពោះឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន ដែលតែងតែគិតគូពីសុខទុក្ខ និងជីវភាពប្រជាសហគមន៍ និងបានជ្រើសរើសសហគមន៍តំបន់ការពារធម្មជាតិរាំងខ្វាវជាសហគមន៍ដំបូងគេចំនួន៣ ដែលទទួលបានគម្រោងនេះ ក្នុងចំណោមសហគមន៍តំបន់ការពារធម្មជាតិចំនួន ១៩០ នៅទូទាំងប្រទេស។

បន្ទាប់មក ក្រុមការងារក៏បានបន្តចុះទៅពិនិត្យទីតាំងផ្ទៃដីជាក់ស្ដែង ដោយយកចំនុចនិយាមការ និងបង្ហោះដ្រូនថតយករូបភាពទីតាំងភូមិសាស្រ្តពីលើអាកាស ដើម្បកំណត់ទំហំផ្ទៃដី២ហិកតា សម្រាប់អនុវត្តក្នុងឆ្នាំ២០២៣។