វេទិកាជាតិប្លាស្ទិកលើកទី៣ ក្រោមប្រធាន «ការទប់ស្កាត់ការបំពុលដោយប្លាស្ទិកនៅកម្ពុជា»

កម្មវត្ថុចម្បងនៃវេទិកានេះ គឺដើម្បីផ្សព្វផ្សាយកិច្ចខិតខំប្រឹងប្រែងរបស់កម្ពុជាក្នុងការទប់ស្កាត់ការបំពុលដោយប្លាស្ទិក ក៏ដូចជាបង្ហាញពីគំនិតផ្តួចផ្តើមលើកកម្ពស់ការយល់ដឹងប្រកបដោយភាពច្នៃប្រឌិតនានា ព្រមទាំងផ្សព្វផ្សាយអាជីវកម្មវិលជុំប្រកបដោយភាពច្នៃប្រឌិតដែលចូលរួមដល់ការដោះស្រាយការបំពុលដោយប្លាស្ទិក។

ក្នុងឱកាសនោះដែរ ឯកឧត្តម ជួប ប៉ារីស៍ បានសម្តែងនូវក្តីសោមនស្សរីករាយ ដែលបានចូលរួមក្នុងវេទិកាដ៏សំខាន់នេះ ហើយក៏សូមថ្លែងអំណរគុណដល់ស្ថាប័ន អង្គការដៃគូនានា ដែលតែងតែគាំទ្រក្រសួងបរិស្ថាន ក្នុងកិច្ចខិតខំប្រឹងប្រែងក្នុងការកាត់បន្ថយការបំពុលដោយប្លាស្ទិក។ ឯកឧត្តម បានគូសបញ្ជាក់ថា កិច្ចគាំពារបរិស្ថាន ក៏ដូចជាការទប់ស្កាត់ការបំពុលដោយប្លាស្ទិកនៅកម្ពុជា ក្រសួងបរិស្ថាន មិនអាចធ្វើទៅបានដោយម្នាក់ឯងនោះទេ គឺទាមទារឱ្យមានការចូលរួមសហការពីគ្រប់ភាគីពាក់ព័ន្ធទាំងអស់។ វេទិកាជាតិប្លាស្ទិកលើកទី៣ នាពេលនេះ ឯកឧត្តម ជួប ប៉ារីស៍ សំណូមពរឱ្យគ្រប់ភាគីពាក់ព័ន្ធទាំងអស់ ក៏ដូចជាយុវជន ជំរុញការផ្សព្វផ្សាយឱ្យកាន់តែទូលំទូលាយ បន្តកិច្ចគាំទ្រសហការជាមួយក្រសួងបរិស្ថានបន្តទៀត ក្នុងការអនុវត្តកិច្ចការទប់ស្កាត់ការបំពុលដោយប្លាស្ទិកនៅកម្ពុជា ឱ្យកាន់តែប្រសិទ្ធភាពថែមទៀត។

គួរបញ្ជាក់ឱ្យដឹងថា វេទិកាជាតិប្លាស្ទិកលើកទី៣ ក៏មានការផ្តល់ជូននូវបណ្ណសរសើរដល់រូបវន្តបុគ្គល និងនីតិបុគ្គល មួយចំនួន ដែលបានចូលរួមផ្តល់នូវគំនិតផ្តួចផ្តើម និងដំណោះស្រាយចំពោះបញ្ហាប្រឈមនៃសំណល់ប្លាស្ទិក ដែលជាប្រយោជន៍ក្នុងកិច្ចគាំពារបរិស្ថាន ដើម្បី «ការរស់នៅស្អាត ភូមិឋានស្អាត សុខភាពល្អ ជីវិតរីករាយ និងអនាគតរុងរឿង» ។ ជាពិសេស មានការតាំងពិព័រណ៍ពីផលិតផលដែលច្នៃពីប្លាស្ទិក ការសម្តែងអប់រំអំពីប្លាស្ទិក ដូចជា ការបង្ហាញម៉ូតសម្លៀកបំពាក់កែច្នៃពីប្លាស្ទិក ការសម្តែងល្ខោនស្បែកតូច ការសម្តែងចម្រៀងចាប៉ីដងវែង ការសម្តែងរឿងអប់រំពីប្លាស្ទិក ការបង្ហាញពីសកម្មភាពនិងបទពិសោធនានា ក្នុងការកាត់បន្ថយប្លាស្ទិក ការផលិតសម្ភារៈពីប្លាស្ទិក និងការកាត់បន្ថយប្លាស្ទិកនៅកម្ពុជា។