ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានទទួលជួបសម្តែងការគួរសមជាមួយលោកស្រី Sandrine BOUCHER នាយិកាប្រចាំតំបន់ថ្មី នៃទីភ្នាក់ងារបារាំងដើម្បីការអភិវឌ្ឍ (AFD) ប្រចាំប្រទេសកម្ពុជា
ថ្ងៃ សុក្រ, 21 មេសា, 2023នៅថ្ងៃព្រហស្បតិ៍ ទី២០ ខែមេសា ឆ្នាំ២០២៣ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានទទួលជួបសម្តែងការគួរសមជាមួយលោកស្រី Sandrine BOUCHER នាយិកាប្រចាំតំបន់ថ្មី នៃទីភ្នាក់ងារបារាំងដើម្បីការអភិវឌ្ឍ (AFD) ប្រចាំប្រទេសកម្ពុជា។ នៅក្នុងជំនួបនេះ ឯកឧត្តមរដ្ឋមន្ត្រី បានថ្លែងអំណរគុណចំពោះរដ្ឋាភិបាលបារាំង ជាពិសេសឯកឧត្តម អេម៉ានុយអ៊ែល ម៉ាក្រុង ប្រធានាធិបតីបារាំង ដែលបានផ្ដល់ការវាយតម្លៃខ្ពស់ដល់យុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹត្យកាបូន និងកិច្ចខិតខំប្រឹងប្រែងប្រយុទ្ធប្រឆាំងនឹងការប្រែប្រួលអាកាសធាតុ របស់រាជរដ្ឋាភិបាលកម្ពុជា។ លោកស្រី BOUCHER បានគូសបញ្ជាក់ជូនឯកឧត្តមរដ្ឋមន្ត្រីថា AFD បាននិងកំពុងអនុវត្តគម្រោងជាច្រើននៅកម្ពុជា ដែលមានភាពស៊ីសង្វាក់គ្នាទៅនឹងអាទិភាពការងាររបស់រាជរដ្ឋាភិបាល ជាពិសេសនៅក្នុងវិស័យបរិស្ថាន។ ក្រសួងបរិស្ថាន និង AFD បានឯកភាពបន្តជំរុញកិច្ចសហប្រតិបត្តិការបន្ថែមទៀត លើក្របខ័ណ្ឌការងារហិរញ្ញប្បទានបៃតង ការលើកកម្ពស់ជីវភាពប្រជាសហគមន៍ ប្រសិទ្ធភាពថាមពល ការអភិរក្សជីវៈចម្រុះ កិច្ចគាំពារបរិស្ថាន ក៏ដូចជា ការអប់រំផ្សព្វផ្សាយអំពីបញ្ហាបរិស្ថាន និងការរស់នៅដោយចីរភាពនៅកម្ពុជា។
ព័ត៌មានបន្ថែម
