កិច្ចប្រជុំពិភាក្សាលើសេចក្តីព្រាងចុងក្រោយ “គោលនយោបាយ និងចក្ខុវិស័យ៥ឆ្នាំ ២០២៣-២០២៧ របស់មូលនិធិបរិស្ថាននិងសង្គម និងនីតិវិធី”

រសៀលថ្ងៃទី១៥ ខែសីហា ឆ្នាំ២០២៣ នៅទីស្តីការក្រសួងបរិស្ថាន ក្រោមអធិបតីភាពឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងជាប្រធានគណ:កម្មាធិការមូលនិធិបរិស្ថាននិងសង្គម ដោយមានការចូលរួមពីសមាជិក-សមាជិការនៃគណ:កម្មាធិការមូលនិធិបរិស្ថាននិងសង្គមមកពីស្ថាប័នពាក់ព័ន្ធ អង្គភាពក្រោមឱវាទក្រសួងបរិស្ថាន និងលេខាធិការដ្ឋាន នៃគណ:កម្មាធិការមូលនិធិបរិស្ថាននិងសង្គម បានប្រជុំពិភាក្សាលើសេចក្តីព្រាងចុងក្រោយ “គោលនយោបាយ និងចក្ខុវិស័យ៥ឆ្នាំ ២០២៣-២០២៧ របស់មូលនិធិបរិស្ថាននិងសង្គម និងនីតិវិធីទាំង៥ រួមមាន:

១-នីតិវិធីប្រតិបត្តិស្តង់ដារសម្រាប់ការគ្រប់គ្រងមូលនិធិ និងគម្រោងដែលប្រើប្រាស់ថវិកាមូលនិធិបរិស្ថាននិងសង្គម

២-នីតិវិធីហិរញ្ញវត្ថុសម្រាប់មូលនិធិបរិស្ថាននិងសង្គម

៣-នីតិវិធីលទ្ធកម្មសម្រាប់មូលនិធិបរិស្ថាននិងសង្គម

៤-នីតិវិធីប្រតិបត្តិក្នុងការប្រមូលចំណូលមូលនិធិបរិស្ថាននិងសង្គម

៥-នីតិវីធីប្រតិបត្តិសម្រាប់ការតាមដាន និងវាយតម្លៃគម្រោងដែលប្រើប្រាស់មូលនិធិបរិស្ថាននិងសង្គម។

ឯកឧត្តមរដ្ឋមន្ត្រីបានបញ្ជាក់អំពីសារៈសំខាន់របស់មូលនិធិបរិស្ថាននិងសង្គម ជាថវិកាបំពេញបន្ថែមឱ្យថវិកាជាតិ ដើម្បីរួមចំណែកស្តារធនធានបរិស្ថាន អភិរក្សជីវៈចម្រុះ កសាងប្រព័ន្ធរដ្ឋបាលទំនើប ពង្រឹងប្រសិទ្ធិភាពការងារ កាត់បន្ថយភាពក្រីក្រក្នុងសហគមន៍មូលដ្ឋាន និងរៀបចំផែនការប្រើប្រាស់ទឹកដីប្រកបដោយចីរភាព ដើម្បីទុកជាឧត្តមប្រយោជន៍សម្រាប់ប្រជាជនខ្មែរគ្រប់រូប។