រដ្ឋមន្រ្តីក្រសួងបរិស្ថានអនុញ្ញាតឱ្យ GGGI ចូលជួបសម្តែងការគួរសម និងចូលរួមយុទ្ធនាការកាត់បន្ថយថង់ប្លាស្ទិក
ថ្ងៃ អង្គារ, 26 កញ្ញា, 2023ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអនុញ្ញាត្តឱ្យកញ្ញា Shomi Kim តំណាងប្រចាំប្រទេស នៃវិទ្យាស្ថានអភិវឌ្ឍបៃតងសកល ចូលជួបសម្តែងការគួរសម និងពិភាក្សាការងារលើការផលិតជីវប្លាស្ទិក (Bio degradable plastic) នៅទីស្តីការក្រសួងបរិស្ថាន នារសៀលថ្ងៃទី២៦ ខែកញ្ញា ឆ្នាំ២០២៣ ។
ក្នុងជំនួបនេះ កញ្ញា Shomi Kim តំណាងប្រចាំប្រទេស នៃវិទ្យាស្ថានអភិវឌ្ឍបៃតងសកល បានថ្លែងអបអរសាទរជូនចំពោះឯកឧត្តមរដ្ឋមន្រ្តី និងថ្លែងអរគុណ ដែលឯកឧត្តមផ្តល់ឱកាស ឱ្យកញ្ញាបានជួបសម្តែងការគួរសម និងពិភាក្សាលើប្រធានបទដ៏សំខាន់ លើការងារផលិតជីវប្លាស្ទិក (Bio degradable plastic) ដើម្បីរិតចំណងនៃកិច្ចសហប្រតិបត្តិរវាងក្រសួងបរិស្ថាន និង វិទ្យាស្ថានអភិវឌ្ឍបៃតងសកលកាន់តែល្អប្រសើរ ។
ជាមួយគ្នាផងដែរ ឯកឧត្តមរដ្ឋមន្ត្រីបានថ្លែងអំណរគុណចំពោះកិច្ចសហការ រវាងវិទ្យាស្ថានអភិវឌ្ឍបៃតងសកលនិងក្រសួងបរិស្ថានរាប់ចាប់ពីឆ្នាំ២០១២មក ហើយឯកឧត្តមបានគូសបញ្ជាក់ទៀតថា ក្រសួងបាននឹងកំពុងអនុវត្តយុទ្ធនាការកាត់បន្ថយការប្រើប្រាស់ប្លាស្ទិក លើប្រធានបទ ” ថ្ងៃនេះ ខ្ញុំមិនប្រើថង់ប្លាស្ទិកទេ ” ជាមួយនឹងសិស្សានុ សិស្សប្រមាណជាង ១លាននាក់ហើយ នៅតាមសាលាក្នុងប្រទេសកម្ពុជា។ ជាជំហានបន្ទាប់ក្រសួងនឹងបន្តយុទ្ធនាការនេះ ជាមួយបណ្តារោងចក្រ សហគ្រាស និងក្រុមហ៊ុនឯកជនថែមទៀត ។
កញ្ញា Shomi Kim បានអបអរចំពោះជោគជ័យក្នុងជំហានទី១ ដែលក្រសួងសម្រេចបាន ហើយវិទ្យាស្ថានអភិវឌ្ឍបៃតងសកលនឹងចូលរួមគាំទ្រលើយុទ្ធនាការកាត់បន្ថយការប្រើប្រាស់ប្លាស្ទិកនេះ តាមរយៈការផលិតជីវប្លាស្ទិក (Bio degradable plastic) ។ ជាការឆ្លើយតប ឯកឧត្តមរដ្ឋមន្ត្រីថ្លែងអំណរគុណចំពោះការគាំទ្រ ក្នុងភាពជាដៃគូ ហើយក្រសួងនឹងបន្តក្នុងភាពជាម្ចាស់នៃយុទ្ធនាការនេះ ដើម្បីសម្រេចបានគោលដៅរួមគ្នា ជាមួយវិទ្យាស្ថានអភិវឌ្ឍបៃតងសកល ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាក្នុងដំណាក់កាលទី១នេះ ៕
