ឯកឧត្តមបណ្ឌិត អ៊ាង សុផល្លែត៖ ក្រសួងបរិស្ថាន នៅក្នុង អាណត្តិរាជរដ្ឋាភិបាលនីតិកាលទី៧នេះ បានកំណត់ទិសដៅការងារជាអាទិភាព គឺការលើកកម្ពស់ការយល់ដឹង និងការចូលរួមរបស់ប្រជាពលរដ្ឋ សំដៅផ្លាស់ប្តូរឥរិយាបទនិងទម្លាប់ការរស់នៅរបស់ប្រជា-ពលរដ្ឋកម្ពុជា ក្នុងការរស់នៅស្អាត បរិស្ថានបៃតង និងអព្យាក្រឹត្យកាបូន

ដើម្បីបន្តដាក់ចេញនិងអនុវត្តវិធានការកាត់បន្ថយការប្រើប្រាស់ថង់ប្លាស្ទិក ក្រសួងបរិស្ថាន នៅក្នុង អាណត្តិរាជរដ្ឋាភិបាលនីតិកាលទី៧នេះ បានកំណត់ទិសដៅការងារជាអាទិភាព គឺការលើកកម្ពស់ការយល់ដឹង និងការចូលរួមរបស់ប្រជាពលរដ្ឋ សំដៅផ្លាស់ប្តូរឥរិយាបទនិងទម្លាប់ការរស់នៅរបស់ប្រជា-ពលរដ្ឋកម្ពុជា ក្នុងការរស់នៅស្អាត បរិស្ថានបៃតង និងអព្យាក្រឹត្យកាបូន។ នេះជាការលើកឡើង របស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងពិធីចុះអនុស្សរណៈយោគយល់ រវាងក្រសួងបរិស្ថាន ជាមួយ កាកបាទក្រហមកម្ពុជា រដ្ឋបាលខេត្តកំពង់ឆ្នាំង ខេត្តកណ្តាល និងខេត្តពោធិ៍សាត់ និងបើកយុទ្ធនាការ កាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» នៅគ្រប់សាលាទូទាំងខេត្តកំពង់ឆ្នាំងនាថ្ងៃសៅរ៍ទី ៣០ ខែកញ្ញាឆ្នាំ២០២៣។

ជាមួយគ្នានេះដែរ ឯកឧត្តមបណ្ឌិត អ៊ាង សុផល្លែត បានបញ្ជាក់ថា កម្ពុជាក៏បាននិងកំពុងប្រឈម ជាមួយនឹងបញ្ហាសំណល់ប្លាស្ទិកផងដែរ ជាពិសេសសំណល់ថង់ប្លាស្ទិក ដែលភាគច្រើនមិនត្រូវបានប្រមូលយកមកកែច្នៃ និងបានចោល លាយឡំជាមួយសំរាម សំណល់រឹងទីប្រជុំជន និងមានភាពរាយប៉ាយនៅតាមទីវាល និងប្រភព ទឹកស្ទើរគ្រប់ទីកន្លែង។

ឯកឧត្តមរដ្ឋមន្រ្តី បានឲ្យដឹងថា គោលដៅនៃការអប់រំ និងការផ្លាស់ប្តូរទម្លាប់នៃការរស់នៅជាចំបង គឺផ្តោតលើការអប់រំសិស្សានុសិស្សនៅតាមសាលាចំណេះដឹងទូទៅមុនគេ ដែលពួកគេជាកោសិកាថ្មីរបស់សង្គម ហើយមានលទ្ធភាពក្នុងការជួយពង្រីកការអប់រំដល់សមាជិកគ្រួសារ និងសង្គមផងដែរ។ ហេតុដូចនេះ ក្រសួងបរិស្ថានបានកំណត់យកថ្ងៃ ១ កញ្ញា ជាថ្ងៃចាប់ផ្តើមយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលផ្តើមចេញពីសិស្សានុសិស្ស រួមទាំងលោកគ្រូ អ្នកគ្រូ ចំនួនជាង ១៨ ៧០០នាក់ នៃសាលារៀនទាំង៤៤ ក្នុងស្រុកអូររាំងឪ ខេត្តត្បូងឃ្មុំ ដោយចាប់ផ្តើមពីការមិនប្រើប្រាស់ថង់ប្លាស្ទិកយ៉ាងតិច១ថ្ងៃ ក្នុង១សប្តាហ៍ ឈានទៅ២ថ្ងៃ ៣ថ្ងៃ ឬ ៤ថ្ងៃ ក្នុង១សប្តាហ៍ ដើម្បីរួមចំណែកក្នុងការកាត់បន្ថយការបង្កើត និងការចោលសំរាមតាមសាលារៀន តាមលំនៅស្ថាន និងនៅក្នុងភូមិ ឃុំរបស់ពួកគេ រហូតដល់បានផ្លាស់ប្តូរទម្លាប់ពីការប្រើប្រាស់ ថង់ប្លាស្ទិកទាំងស្រុងនាពេលអនាគត។

យុទ្ធនាការកាត់បន្ថយការប្រើប្រាស់ថង់ប្លាស្ទិកនេះ បាននិងកំពុងទទួលការគាំទ្រ និងការចូលរួមអនុវត្តពីគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សនៅតាមគ្រឹះស្ថានសិក្សាចំណេះទូទៅ នៃរាជធានីខេត្តមួយចំនួនជាបន្តបន្ទាប់។ ជាក់ស្តែង ក្នុងរយៈពេលជិត១ខែនេះ គឺមានសិស្សានុសិស្សចំនួន១លាន២សែន៧ម៉ឺននាក់ នៃសាលារៀនចំនួនជាង ៩០០០ នៅរាជធានី-ខេត្តចំនួន២០ បានស្ម័គ្រចិត្តចូលរួមអនុវត្តយុទ្ធនាការនេះ។ ជាមួយគ្នានេះដែរ ចាប់ពីថ្ងៃទី២៣ ខែកញ្ញា វិស័យឯកជនមួយចំនួន ជាពិសេស រោងចក្រកាត់ដេរសម្លៀកបំពាក់ចំនួន១៥ ក្នុងរាជធានីភ្នំពេញ ខេត្តកណ្តាល និងខេត្តស្វាយរៀង ដែលមានកម្មករជាង ៧៥០០ នាក់ ក៏បានចាប់ផ្តើមស្ម័គ្រចិត្តចូលរួមជាមួយក្រសួងបរិស្ថាន ក្នុងការអនុវត្តយុទ្ធនាការមិនប្រើប្រាស់ថង់ប្លាស្ទិក យ៉ាងតិច១ថ្ងៃ ក្នុង១សប្តាហ៍។

សូមបញ្ជាក់ថា ប្រសិនបើសិស្សានុសិស្សនៅទូទាំងប្រទេសមានចំនួន សរុបប្រមាណជាង ៣,៧លាននាក់ បើយើងអាចកាត់បន្ថយការប្រើប្រាស់ ក៏ដូចបញ្ឈប់ការបង្កើតសំណល់ថង់ប្លាស្ទិកក្នុង ១ថ្ងៃ បានចំនួនប្រមាណ ១៥លានថង់៕