សន្និសីទស្ថាបនិកនៃសម្ព័ន្ធភាពថាមពលព្រះអាទិត្យអន្តរជាតិ និងកិច្ចប្រជុំកំពូលថាមពលព្រះអាទិត្យ

ពិធីបើកផ្លូវការនៃសន្និសីទ និងកិច្ចប្រជុំ ត្រូវបានប្រព្រឹត្តទៅក្រោមអធិបតីភាពប្រធានាធិបតីនៃសាធារណរដ្ឋបារាំង និងនាយករដ្ឋមន្ត្រីសាធារណរដ្ឋឥណ្ឌា និងមានការចូលរួមពីប្រមុខរដ្ឋ ប្រមុខរដ្ឋាភិបាល រដ្ឋមន្ត្រី និងថ្នាក់ដឹកនាំមកពីបណ្តាប្រទេសហត្ថលេខីនៃកិច្ចព្រមព្រៀងក្រមខណ្ឌសម្ព័ន្ធភាពថាមពលព្រះអាទិត្យអន្តរជាតិចំនួន៥០ប្រទេស និងតំណាងដែគូអភិវឌ្ឍន៍សរុបប្រមាណ៥០០នាក់។

គួរបញ្ជាក់ផងដែរថា សម្ព័ន្ធភាពថាមពលព្រះអាទិត្យអន្តរជាតិដែលបានបង្កើតឡើងនៅក្នុងអំឡុងពេលនៃកិច្ចប្រជុំសន្និសីទបណ្តាភាគីនៃអនុសញ្ញាក្របខណ្ឌសហប្រជាតិស្តីពីការប្រែប្រួលអាកាសធាតុលើកទី២១ (COP21) នៅទីក្រុងបារីស ក្រោមកិច្ចផ្តួចផ្តើមរបស់ប្រធានាធិបតីនៃសាធារណរដ្ឋបារាំង និងនាយករដ្ឋមន្ត្រីនៃសាធារណរដ្ឋឥណ្ឌា ក្នុងគោលបំណងចូលរួមជុំរុញការសម្រេចនូវគោលដៅទី៧ « ធានាឲ្យទទួលបានថាមពលដែលមាន​បច្ចេក​ទេសទំនើប ប្រកប​ដោយ​ចីរភាព អាចជឿជាក់បាន និងមានតម្លៃសមរម្យ សម្រាប់ប្រជាជនគ្រប់រូប» (Affordable and Clean Energy) នៃគោលដៅអភិវឌ្ឍន៍ដោយចីរភាពឆ្នាំ២០៣០។

គិតមកត្រឹមថ្ងៃនេះមានប្រទេសចំនួន៦០ បានចុះហត្ថលខាលើកិច្ចព្រមព្រៀងក្របខណ្ឌសម្ព័ន្ធភាពថាមពលព្រះអាទិត្យនេះ ដែលក្នុងនោះ២៦ប្រទេសបានផ្តល់សច្ចាប័ន ហើយកម្ពុជាក៏ជាប្រទេសហត្ថលេខីមួយផងដែរ៕