សិក្ខាសាលាផ្សព្វផ្សាយស្តីពីបទដ្ឋានគតិយុត្តវិស័យបរិស្ថានខេត្តស្ទឹងត្រែង

ខេត្តស្ទឹងត្រែង នៅថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ បានរៀបចំសិក្ខាសាលាផ្សព្វផ្សាយស្តីពីបទដ្ឋានគតិយុត្តវិស័យបរិស្ថាន ដោយផ្តោតលើវិស័យ ជំនាញ៤ កិច្ចគាំពារបរិស្ថាន ការអភិរក្សជីវៈចម្រុះ ការរស់នៅដោយចីរភាព និងការអប់រំបរិស្ថាន ដល់មន្រ្តីជំនាញ នៅមន្ទីរបរិស្ថាន និងមន្រ្តីនៅស្ថាប័នពាក់ព័ន្ធថ្នាក់ក្រោមជាតិជាច្រើននាក់។

ឯកឧត្តម ស៊ូ សូវុធ អនុរដ្ឋលេខាធិការនៃ ក្រសួងបរិស្ថាន ដែលអញ្ជើញចូលររួមជាគណៈអធិបតី បានឱ្យដឹងថាសិក្ខាសាលានេះ រៀបចំឡើងសំដៅបង្កើនការចូលរួមពីមន្រ្តីជំនាញពីគ្រប់ស្ថាប័ន ទាំងថ្នាក់ ជាតិ និងថ្នាក់ក្រោមជាតិ ដើម្បីអនុវត្តការងារមានប្រសិទ្ធភាព នៅក្នុងការថែរក្សា ការពារ អភិរក្សជីវៈចម្រុះ ប្រកប ដោយនិរន្តរភាព៕