រដ្ឋមន្រ្តីក្រសួងបរិស្ថានបើកកិច្ចប្រជុំផ្សព្វផ្សាយផែនទីឯកភាពការងារគ្រប់គ្រងបរិស្ថាន និងធនធានធម្មជាតិសម្រាប់អាណត្តិរាជរដ្ឋាភិបាលនីតិកាលទី៦ នៃរដ្ឋសភា

កិច្ចប្រជុំនេះមានការចូលរួមពីថ្នាក់ដឹកនាំថ្មី នៃក្រសួងបរិស្ថានសម្រាប់អាណត្តិទី៦​ មន្រ្តីរាជការគ្រប់ជាន់ថ្នាក់ចំណុះក្រសួងបរិស្ថាន និងមន្ទីរបរិស្ថានទាំង២៥ រាជធានី-ខេត្ត​ និងដៃគូអភិវឌ្ឍ​ ដើម្បីជំរុញ​ និងគូសវាសផែនទី​ បែងចែកតួនាទីភារកិច្ចក្នុងការអនុវត្តការងារ​ សំដៅធានាបាននូវតុល្យភាព​ សេដ្ឋកិច្ច​ បរិស្ថាន​ សង្គម។ កិច្ចប្រជុំពេលនេះ ជំរុញលើកទឹកចិត្តឱ្យមានការចូលរួមពីអ្នកពាក់ព័ន្ធ​ ដៃគូអភិវឌ្ឍនានា​ ធ្វើយ៉ាងណាឱ្យក្របខណ្ឌយុទ្ធសាស្រ្ត​ ឆ្នាំ២០១៨-២០២៣​ ដើម្បីអនុវត្តការងារលើវិស័យបរិស្ថានទទួលបានគុណភាព​ និងនិរន្តរភាពបរិស្ថាន។

ផែនការយុទ្ធសាស្រ្តក្រសួងបរិស្ថាន នៅក្នុងអាណត្តិរាជរដ្ឋាភិបាលថ្មីនេះ ត្រូវធានាការពារធនធានធម្មជាតិរបស់កម្ពុជា​ សម្រាប់ជាប្រយោជន៍ដល់ប្រជាជន​ និងសង្គម​ ដែលជាចក្ខុវិស័យអភិវឌ្ឍដោយចីរភាពក្នុងឆ្នាំ២០២៣​ ដែលជាមាគ៌ាឆ្ពោះទៅរកអនាគតមួយប្រកបដោយវិបុលភាពសម្រាប់ប្រជាពលរដ្ឋគ្រប់រូប​ ដោយបរិស្ថានល្អ​ផងដែរ៕