អាជ្ញាធរ លោកគ្រូអ្នកគ្រូ និងក្រុមយុវជននៅស្រុកទឹកឈូប្រមាណជិត២ពាន់នាក់ បានប្តេជ្ញាចិត្តកាត់បន្ថយការប្រើប្រាស់ថង់ប្លាស្ទិក

អាជ្ញាធរមូលដ្ឋាន ក្រុមយុវជន លោកគ្រូអ្នកគ្រូ និងសិស្សានុសិស្សប្រមាណជិត ២ពាន់នាក់ បានប្តេជ្ញាចិត្តកាត់បន្ថយការប្រើប្រាស់ថង់ប្លាស្ទិកអោយខាងតែបាន យ៉ាងហោចណាស់ឈប់ប្រើប្លាស្ទិកឱ្យបាន១ថ្ងៃ ក្នុង១សប្តាហ៍ នឹងបន្តទៅ២ថ្ងៃ ទៅ៣ថ្ងៃ រហូតដល់បញ្ឈប់ការប្រើប្រាស់ប្លាស្ទិកទាំងស្រុងតែម្តង ក្រោយពីពួកគាត់បានចូលរួមក្នុងយុទ្ធនាការកាត់បន្ថយការប្រើប្រាស់សំណល់ប្លាស្ទិក ក្រោមប្រធានបទ«ថ្ងៃនេះ ខ្ញុំមិនប្រើថង់ប្លាស្ទិកទេ» ដែលធ្វើឡើងនៅវិទ្យាល័យព្រះនរោត្តមរណឬទ្ធិ ស្រុកទឹកឈូ ខេត្តកំពត នាថ្ងៃអាទិត្យទី១៩ វិច្ឆិកា ឆ្នាំ២០២៣ ។

សូមជម្រាបជូនថា យុទ្ធនាការកាត់បន្ថយការប្រើប្រាស់សំណល់ប្លាស្ទិក ក្រោមប្រធានបទ«ថ្ងៃនេះ ខ្ញុំមិនប្រើថង់ប្លាស្ទិកទេ» នៅស្រុកទឹកឈូ ខេត្តកំពតនេះ មានការចូលរួមពី លោកអភិបាលរងស្រុក យុវជនកាយរិទ្ធិ កាកបាទក្រហម ស.ស.យ.ក.រដ្ឋបាលស្រុកនិងអជ្ញាធរឃុំ សហគមន៍យុវជនម៉ូស្លីម អធិការនគរបាល និងប៉ុស្តិ៍រដ្ឋបាល កងរាជអាវុធហត្ថស្រុក ប្រតិបត្តិការសឹករងស្រុក ប្រជាការពារ លោកគ្រូអ្នកគ្រូ សិស្សានុសិស្ស និងប្រជាពលរដ្ឋចំនួន១,៤៤៦នាក់ (ស្រី ៥២៦នាក់) ក្រោមអធិបតីភាពលោកជំទាវ ម៉ុម ថានី រដ្ឋលេខាធិការក្រសួងបរិស្ថាន ។ លើសពីនេះ គណៈធិបតី និងអង្គពិធី រួមនឹងសិស្សានុសិស្សបានដាំដើមឈើ ១០០ដើមទុកជាអនុស្សាវរីយ៍ និងដើម្បីឱ្យបរិស្ថានក្នុងបរិវេណវិទ្យាល័យព្រះនរោត្តមរណឬទ្ធិ ស្រុកទឹកឈូមានភាពបៃតងស្រស់ ៕