មន្រ្តីជំនាញនិងដៃគូរបណ្តុះបណ្តាលឧទ្យានុរក្សលើការអង្កេតជីវៈចម្រុះនៅខេត្តកំពង់ធំ
ថ្ងៃ ពុធ, 28 កុម្ភៈ, 2018នៅខេត្តកំពង់ធំ នាថ្ងៃអង្គារ ១៣កើត ខែផល្គុណ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៧ ខែមីនា ឆ្នាំ២០១៨ នាយកដ្ឋានអភិរក្សតំបន់ដីសើមទឹកសាប នៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ ក្រសួងបរិស្ថាន សហការជាមួយ អង្គការជីវិតសត្វស្លាបអន្តរជាតិប្រចាំកម្ពុជា និងអង្គការជីវិតធម្មជាតិនៅកម្ពុជា បានរៀបចំវគ្គបណ្តុះបណ្តាលស្តីពីពិធីសារអង្កេតតាមដានជីវៈចម្រុះ ការប្រើប្រាស់ឧបករណ៍GPS និងជំនាញមូលដ្ឋានក្នុងការកំណត់អត្តសញ្ញាណសត្វស្លាបដល់ឧទ្យានុរក្សតំបន់ស្នូលស្ទឹងសែន ក្នុងគោលបំណងដើម្បីបង្កើនសមត្ថភាពដល់ឧទ្យានុរក្សក្នុងការល្បាត និងប្រមូលទិន្នន័យជីវចម្រុះក្នុងតំបន់ស្នូល ដែលជាទិន្នន័យស្នូលក្នុងការរៀបចំ និងអនុវត្តផែនការគ្រប់គ្រង់។ វគ្គបណ្តុះបណ្តាលនេះមានគ្រូបង្គោលពីររូបដែលមានបទពិសោធន៍ពីនាយកដ្ឋានអភិរក្សតំបន់ដីសើមទឹកសាបធ្វើការបង្ហាត់បង្រៀន។ ក្រោយពីបញ្ចប់វគ្គបណ្តុះបណ្តាលនេះ អង្គការជីវិតសត្វស្លាបអន្តរជាតិប្រចាំកម្ពុជា បានប្រគល់ឧបករណ៍GPS ២គ្រឿង កែវឆ្លុះ ២គ្រឿង និងកំព្យូទ័រ ១គ្រឿង ដល់ឧទ្យានុរក្សតំបន់ស្នូលស្ទឹងសែនដើម្បីប្រើប្រាស់ក្នុងពេលល្បាត៕
