ក្រសួងបរិស្ថាន បើកបង្ហាញផែនទីបង្ហាញផ្លូវ ដើម្បីអនាគតកម្ពុជាស្អាត បៃតង និងប្រកបដោយចីរភាព

ផែនទីបង្ហាញផ្លូវនេះត្រូវបានរៀបចំឡើងដោយផ្អែកលើយុទ្ធសាស្ត្រចក្រាវិស័យបរិស្ថាន ដែលជាគំនិតផ្តួចផ្តើមដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីជាត្រីវិស័យក្នុងការការពារ និងអភិរក្សធនធានធម្មជាតិប្រកបដោយចីរភាព។ ជាមួយគ្នានេះ ក្រសួងបរិស្ថានបានអនុវត្តយ៉ាងយកចិត្តទុកដាក់ និងបានដាក់ចេញនូវយុទ្ធនាការជាច្រើន ដែលយុទ្ធនាការដំបូងនៃការចូលមកកាន់តួនាទីជារដ្ឋមន្រ្តីក្រសួងរបស់ឯកឧត្តម គឺយុទ្ធនាការ ថ្ងៃនេះ ខ្ញុំមិនប្រើប្រាស់ថង់ប្លាស្ទិកទេ! ដែលនេះជាការអនុវត្តបន្តពីការងារអប់រំ ដែលជាស្នាដៃបន្សល់ទុករបស់ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដីនគរូបនីយកម្ម និងសំណង់ កាលឯកឧត្តមនៅជារដ្ឋមន្រ្តីក្រសួងបរិស្ថាន និងបានបន្តមកដល់យុទ្ធនាការកម្ពុជាស្អាត ខ្មែរធ្វើបាន និងផ្លូវជាតិគ្មានសំរាមប្លាស្ទិក ដែលកំពុងទទួលបានការគាំទ្រពីប្រជាពលរដ្ឋកម្ពុជាច្រើនជាង១១លាននាក់។