អនាម័យបរិស្ថានស្អាតគឺផ្តើមចេញពីយើងទាំងអស់គ្នា

រួមគ្នាដើម្បីបរិស្ថាន

Zoning Report Phnum Aural Wildlife SanctuaryManagement Plant Tatai Wildlife Sanctuary 2025-2035Management Plant Phnum Samkos Wildlife SanctuaryManagement Plant Phnum Aural Wildlife Sanctuary 2022-2031Management Plant Phnom Samkus Wildlife Sanctuary 2022-2031

ព្រៃវែង ៖ ឯកឧត្តម ចាយ សាមិត្ត រដ្ឋលេខាធិការក្រសួងបរិស្ថាន បានគូសបញ្ជាក់ថា អនាម័យបរិស្ថានស្អាតគឺផ្តើមចេញពីយើងទាំងអស់គ្នា ហើយការចូលរួមសហការក្នុងការគ្រប់គ្រងសំរាមបានល្អ នាំឲ្យទីក្រុង ទីប្រជុំជន ជាពិសេសភូមិឋានមានសោភណ្ឌភាព មនុស្សរស់មានសុខភាពល្អ និងការអភិវឌ្ឍន៍ប្រកបដោយចីរភាព។ នេះជាប្រសាសន៍លើកឡើង ក្នុងពេលឯកឧត្តម អញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារបរិស្ថានឆ្នាំ២០២១ និងទិសដៅការងារឆ្នាំ២០២២ របស់មន្ទីរបរិស្ថានខេត្តព្រៃវែង នាព្រឹកថ្ងៃទី១៩ ខែមករា ឆ្នាំ២០២២ នៅសាលាខេត្តព្រៃវែង ដោយមានការចូលរួមពីលោកជំទាវ ព្រំ សុភី អនុរដ្ឋលេខាធិការក្រសួងបរិស្ថាន ឯកឧត្តម ឌុច គន្ធា អភិបាលរងនៃគណៈអភិបាលខេត្តព្រៃវែង ថ្នាក់ដឹកនាំក្រសួងបរិស្ថាន មន្ទីរបរិស្ថានខេត្ត មន្ទីរ អង្គភាពជុំវិញខេត្ត អាជ្ញាធរក្រុង ស្រុក និងអ្នកពាក់ព័ន្ធជាច្រើននាក់។

ក្នុងឱកាសនោះ ឯកឧត្តម ចាយ សាមិត្ត បានថ្លែងបន្តថា ការញែកសំរាមតាមប្រភេទច្បាស់លាស់ និងការជំរុញលើការកែច្នៃឱ្យអស់លទ្ធភាពនឹងចូលរួមកាត់បន្ថយសំណល់សំរាមដែលបោះចោលនៅលើទីលាន និងទទួលបានផលចំណេញផ្នែកសេដ្ឋកិច្ចថែមទៀតផង។ ឯកឧត្តមរដ្ឋលេខាធិការ បានបញ្ជាក់ឱ្យដឹងទៀតថា បញ្ហាបរិស្ថានត្រូវបានរាជរដ្ឋាភិបាលកម្ពុជា ក៏ដូចជាក្រសួងបរិស្ថានយកចិត្តទុកដាក់ ហើយបានដាក់ចេញឱ្យអនុវត្តក្នុងក្របខណ្ឌទូទាំងប្រទេស នូវគោលនយោបាយគ្រប់គ្រងសំរាមសំណាល់រឹងទីប្រជុំជន ដើម្បីពង្រឹង និងដោះស្រាយបញ្ហាគ្រប់គ្រងសំរាម និងសំណល់រឹងនៅទីប្រជុំជនឱ្យមានប្រសិទ្ធភាព និងមានសុវត្ថិភាពបរិស្ថាន។

លោក តូច វ៉ារដ្ឋា ប្រធានមន្ទីរបរិស្ថានខេត្តព្រៃវែង បានលើកឡើងពីផែនការសកម្មភាពគ្រប់គ្រងបរិស្ថាន ដោយសហការជាមួយអាជ្ញាធរពាក់ព័ន្ធ ពង្រឹងការអប់រំនិងផ្សព្វផ្សាយព័ត៌មានបរិស្ថាន ការលើកទឹកចិត្តក្នុងការអនុវត្តសកម្មភាពមេត្រីបរិស្ថានដល់ប្រជាពលរដ្ឋនៅតាមមូលដ្ឋាន ជាពិសេសការគ្រប់គ្រងសំណល់រឹង សំរាមនៅតាមទីក្រុង និងទីប្រជុំជន៕