គម្រោងរៀបចំពិព័រណ៍សហគមន៍ ផ្តល់ការបណ្តុះបណ្តាលជំនាញ ដល់ប្រជាពលរដ្ឋ នៅតាមសហគមន៍តំបន់ការពារធម្មជាតិ ក្នុងខេត្តកំពង់ធំ

ក្នុងឱកាសនោះ លោកជំទាវ ម៉ុម ថានី បានលើកឡើងថា ជំនាញ គឺសំខាន់ណាស់ សម្រាប់យុវជន ក៏ដូចជាចូលរួមអភិវឌ្ឍសេដ្ឋកិច្ចគ្រួសារ និងប្រទេសជាតិយើង។ ការបណ្តុះបណ្តាលនេះ លើកទឹកចិត្តឲ្យប្រជាពលរដ្ឋនៅតាមសហគមន៍ មករៀនជំនាញមួយច្បាស់លាស់ ដើម្បីមានជម្រើសមុខរបរពិតប្រាកដមួយ ជួយកាត់បន្ថយការពឹងអាស្រ័យលើធនធានធម្មជាតិ និងជួយឲ្យសហគមន៍មានការរីចម្រើនរុងរឿង។

លោកជំទាវ បានបន្ថែមថា គម្រោងរៀបចំពិព័រណ៍សហគមន៍ ជាយន្តការគាំទ្រយ៉ាងរឹងមាំ ជួយអភិវឌ្ឍសមត្ថភាពរបស់ប្រជាពលរដ្ឋ ដែលរស់នៅក្នុង និងក្បែរតំបន់ការពារធម្មជាតិ ឱ្យមានជីវភាពរុងរឿង តាមរយៈការដាក់ចេញ នូវផែនការច្បាស់លាស់ គឺការបណ្តុះបណ្តាល ចំណេះជំនាញផ្សេងៗ ប្រកបដោយសក្តានុពល ដែលឆ្លើយតបទៅនឹងតម្រូវការទីផ្សារ ការបង្កើតទំនាក់ទំនងស្អិត រមួតរវាងសហគមន៍ និងដៃគូអភិវឌ្ឍនានា ព្រមទាំងការបង្កើត វេទិកាពិគ្រោះយោបល់ រវាងសហគមន៍ និងពាណិជ្ជករគោលដៅ។

លោកជំទាវរដ្ឋលេខាធិការ បានបន្តដែរថា ប្រជាពលរដ្ឋនៅតាមសហគមន៍តំបន់ការពារធម្មជាតិ ក្នុងខេត្តកំពង់ធំ ទទួលបាន ការបណ្តុះបណ្តាលជំនាញជួសជុលម៉ូតូ របស់គម្រោងរៀបចំពិព័រណ៍ សហគមន៍ ដែលជាផ្នែកមួយជាការផ្តល់ជម្រើសមុខរបរ ដ៏សំខាន់សម្រាប់ជួយបង្កើនសេដ្ឋកិច្ចគ្រួសារ របស់ពួកគាត់នៅតាមមូលដ្ឋាន។

លោក ហឿន សុធីម សមាជិកសហគមន៍តំបន់ការពាររធម្មជាតិជាំធ្លក ភូមិវាលព្រីង ឃុំងន ស្រុកសណ្តាន់ ខេត្តកំពង់ធំ បានសម្តែងការសប្បាយរីករាយ ជាមួយការទទួលបានជំនាញជាជាងជួសជុលម៉ូតូ នៅវិទ្យាស្ថានពហុបច្ចេកវិទ្យា ខេត្តកំពង់ធំ។ លោក ហឿន សុធី បានមកសិក្សាវគ្គជាងម៉ូតូនេះ ជាមួយសមាជិកសហគមន៍ម្នាក់ទៀត រយៈពេល៤ខែ រួចមកហើយ ហើយពេលនេះបានបញ្ចប់ការសិក្សា ប្រមទាំងគ្រោងត្រឡប់ទៅមូលដ្ឋាន បង្កើតជាហាងជួសជុលម៉ូតូ ផ្ទាល់ខ្លួន ដើម្បីរកចំណូលបង្កើនជីវភាពគ្រួសារ។

ក្នុងពេលនេះដែរ លោកជំទាវ ម៉ុម ថានី បានប្រគល់ថវិការបស់គម្រោងរៀបចំពិពរន៍សហគមន៍ ដល់សិក្ខាកាម ដែលជាសមាជិកសហគមន៍តំបន់ការពារធម្មជាតិជាំថ្លក ដែលបានបញ្ចប់វគ្គសិក្សាជាងជួសជុលម៉ូតូ ចំនួន២នាក់ ដែលម្នាក់ៗទទួលបាន ថវិកាចំនួន៣លាន៦សែនរៀល។ ថវិកានេះគឺផ្តល់ជូនដល់សិក្ខាកាម បង្កើតមុខរបរ ដើម្បីបង្កើនជីវភាពគ្រួសារនៅតាមមូលដ្ឋាន។